Gidepensaan sa beteranong pointguard nga si Chris Ross ang iyang kauban sa San Miguel Beermen nga si June Mar Fajardo gikan sa mga pagsaway sa Filipino basketball fans.
Ang Sugboanong higante giuwan og mga pagsaway sa online human sa dili maayong duwa niini atol sa kapildihan sa Gilas Pilipinas batok sa Chinese Taipei, 87-95, sa Fiba Asia Cup niadtong Miyerkules sa kadlawon, Agusto 6, 2025 (PH time), sa Jeddah, Saudi Arabia.
Ning sangkaa, ang produkto sa University of Cebu (UC) Webmasters ug lumad nga taga Lungsod sa Pinamungajan, Cebu igo lang nimugna og duha ka mga puntos ug duha ra sab ka rebounds sulod sa 19 ka mga minutos nga pagduwa.
Gawas niini, nakamugna sab og tulo ka turnovers ang 8-time MVP sa Philippine Basketball Association (PBA).
Nipagawas og detalye si Ross kabahin sa posibleng mga rason sa dili maayong pagduwa ni Fajardo, nga sa iyang tan-aw wala masayri sa publiko.
“June isn’t the focal point of the offense,” tubag ni Ross sa usa ka komentaryo sa usa ka basketball fan sa X, kanhi Twitter.
“Playing in the triangle before during Asian Games, the offense is catered around JB (Justin Brownlee).”
Nakasulti si Ross niini base sa iyang nabatyagan dihang nagduwa siya sa Gilas sa 19th Asian Games sa Hangzhou, China diin nakuha sa mga Pinoy ang gold medal.
Gipasabot ni Ross nga taudtaod na sab nga niduwa si Fajardo nga adunay angol (Dili hinuon kaayo grabe) gikan pa sa malampusong kampanya sa Beermen sa PBA Season 49 Philippine Cup.
Nidugang si Ross nga kadyot ra sab nakapraktis si Fajardo sa Gilas tungod kay niabot man sa finals ug nahimong kampyon ang Beermen sa Philippine Cup.
“Another thing, June hasn’t practiced since Game One of the semis trying to manage his injury. Only if y’all knew what he’s doing just to get on court,” matod ni Ross.
Sa presstime, ang Gilas nagsagubang pa sa ikaduha nilang duwa sa Fiba Asia Cup batok sa New Zealand sa Huwebes sa gabii, Agusto 7. / ESL