Sa usa ka kontrobersyal nga away, napilde ang Pinoy nga boksidor nga si Renan Portes batok ni Japanese Keita Kurihara pinaagi sa split decision sa ilang non-title bout ning bag-uhay lang sa Korakuen Hall sa Tokyo, Japan.
Apan human sa away, gipabuhagay ni Kurihara nga nakonsensya siya ug niangkon nga si Pores gyud unta ang angay nidaug sa ilang panagsumbagay.
Basi sa taho sa Facebook page Pinoy Boxing Prodigy, gigunitan ni Kurihara ang mikropono ug naghilak kining nipabuhagay sa iyang pagtuo nga napilde siya sa away.
Human niini, nipaingon si Kurihara sa dressing room ni Portes aron personal nga isulti ang iyang gibati ngadto sa Pinoy journeyman.
Nagkanayon si Portes, kinsa lumad nga taga Valencia City, Bukidnon, nga grabe ka bug-at ang iyang dughan gumikan kay nisaad siya nga dag-on ang away aron maoy himuong regalo sa adlaw nga natawhan sa iyang anak.
Nangayo og pasaylo si Kurihara ngadto ni Portes.
Gitambagan ni Kurihara si Portes nga sultian ang anak niini nga siya ang nidaug sa away.
Nidugang si Kurihara nga mosang-at siya og protesta kabahin sa desisyon ug nagplano na siyang moretiro.
Kining maong hitabo gikompirmar mismo sa trainer ni Portes nga si Edmond Dellosa sa Superbalita Cebu pinaagi sa Messenger. / ESL