Usa ka person under police custody (PUPC) sa Tudela Municipal Police Station giingong gimingaw sa iyang kaipon hinungdan nga nieskapo samtang padung motambong sa iyang hearing sa korte sa dakbayan sa Danao.
Ang nieskapo giila nga si Rodel Maningo Nudalo, 41, taga Sitio Pamatasan, Barangay Poblacion, lungsod sa San Francisco sa isla sa Camotes, probinsya sa Sugbo, nga dunay kaso sa illegal nga drugas.
Nahitabo ang pag-eskapo sa alas 7:50 sa buntag, Martes, Abril 2, 2024, dihang nangaon sa Bebes Meat Store and Food Eatery sa Barangay Poblacion, Danao.
Matod sa hepe sa Tudela Police Station, PCaptain Leovil Singson, gikan sa Camotes ang PUPC ug gieskortan kini ni Police Corporal Hercules Arguedo uban sa laing duha pa ka mga PUPC paingun sa Danao aron motambong sa hearing sa kaso.
Apan kay sayo pa sa buntag, nangaon una sila sa maong kan-anan, apan sa dihang nananghid si Nudalo nga mokuha og toothpick, kalit lang kini nga midagan.
Gigukod kini sa polis nga escort apan misuot ni sa nag sikit-sikit nga kabalayan ug kalit lang nga nahanaw.
Dali nga milusad og manhunt ang Tudela PNP uban sa Danao City Police Station ug Provincial Intelligence Unit sa Cebu Police Provincial Office, apan pakyas sila sa pagdakop niini.
Pagka ala una sa Miyerkules sa kaadlawon, Abril 3, 2024, dunay nakahatag nila’g impormasyon gikan sa kapuyo ni Nudalo nga nakigkita kini kaniya nga maoy hinungdan nga nakuha nila kini pagbalik.
Giingong gimingaw ang PUPC sa iyang kapuyo nga maoy hinungdan nga misibat kini aron nga makigkita sa daling higayon.
“Maayo ra sad kay along sa among pag hot pursuit, nadakpan ra sad namo ganinang kaadlawon mga 1 o’clock sa morning ang suspect, didto duol sa hospital,” matod ni Singson.
Mohimo og imbestigasyon si Singson kon unsay tulubagon sa iyang personnel nga naeskapohan bisan pa man nga ila kining nadakpan pagbalik. / AYB