Pormal ug grandiyusong giablihan kagahapon ang ika-24 nga season sa Cebu Schools Athletic Foundation, Inc. (Cesafi) sa Cebu Coliseum.
Ang parada sa mga team uban sa ilang tagsatagsa ka mga maanyag nga mga muse maoy mipatid sa opening ceremony nga gisugdan pasado ala una sa hapon.
Hangtod ning pagsuwat, padayon pa ang mga kalihokan sa programa nga gidayandayanan usab og mga presentasyon sa mga estudyante sa nagkalainlaing unibersidad sa Sugbo.
Kon basehan ang mga gibutyag ni commissioner Felix Tiukinhoy ug sa ubang mga Cesafi officials ug sponsors, daghan ang mga nadugang nga naghatag og kalahian sa karon nga season kon itandi sa mga nanglabay.
Usa niini mao ang nahidugang nga 15-under division. So, upat na ka kategoriya ang atong masaksihan kay nauna man niini ang 12-under nga gisugdan mga tulo ka tuig ang nakalabay. Ang Cebu Eastern College (CEC) Dragons maoy defending champion niini.
Sa college division, sa pagkawagtang sa Southwestern University-Phinma Cobras, siyam ka mga team ang magtigi nga pangulohan sa defending back-to-back champions UV Green Lancers.
Samtang ang high school division nga pangulohan usab sa defending champion SHS-Ateneo de Cebu Magis Eagles, nadugangan og bag-ong duha ka mga team nga mao ang Benedicto College ug ang Cebu Rosevelt Memorial College (CRMC).
Sa ato pa, dose na ka mga team ang magkombati. Ang 15-under langkuban usab sa walo ka mga team samtang ang 12-under adunay unom.
Sa gihapon, ang mga duwa sa college ug high school divison ipahigayon matag Martes, Huwebes, Sabado ug Dominggo.
Ang sa 15-under ug 12-under matag Sabado ug Dominggo duwaon.
Gawas niini, ning higayona ubos sa pag-ayuda sa ilang sponsors, ang mga duwa makita na livestream ginamit ang mga dekalidad nga teknolohiya.
Ang tanang duwa sa basketball gikatakdang ipahigayon sa Cebu Coliseum.
Ang ubang events adto ipahigayon ning mosunod: athletics sa Cebu City Sports Center; badminton (Metro Sports); chess (Robinsons Galleria); football (CCSC); karatedo (SM Seaside); taekwondo (Insular Square); swimming (CCSC); table tennis (Robinsons Galleria); tennis (CitiGreen); volleyball (USPF/USC Main/USJR); ug scrabble (Citimall/Robinsons Galleria). Ang sa danceport ila pa nga gi-finalize ang venue.
So, atong malantaw kon unsa ka busy karong tuiga ang Cesafi. Busy nga naghatag usab og kahigayonan sa paghashas sa atong mga student-athlete sa ilang tagsatagsa ka mga abilidad sa natad sa paugnat sa kusog.
Truly hitting the grassroots level. Goodluck Cesafi.
(Note: Kining lindog gisulat kagahapon sa buntag sa wala pa ang opening ceremony sa Cesafi nga sugdan sa ala una sa hapon.)