Opppsss...
Wa kalikayi, daghan gyung misiyaok ning makauuwaw nga kapildihan sa Cebu Classic sa nagpadayon nga Maharlika Pilipinas Basketball League (MPBL) 2025 Season.
Di ta makabasol sa mga Sugboanon o Cebu-based basketball personalities/ethusiasts/fans nga nagpahungaw sa ilang kasagmuyo pinaagi sa social media.
Tiaw mo bay niadtong Huwebes, Hunyo 12, lupig pay gilunopan ang Cebu Classic og taga liog nga bul-og sa baha sa dihang gipukan kini sa Batangas City Tanduay Rum Masters, 131-65.
Kon wa ko masayop kadto maoy pinakadakong labaw nga kadaugan sa usa ka team sa kasaysayan sa MPBL.
Ang 66 puntos nga gintang sa pagdaog mas labaw pa kay sa 65 puntos sa kinatibuk-ang score sa Cebu Classic.
Unsaon man pagkombati sa Cebu Classic nga lupig pa kaayo sila sa tapad unya unom ra ka buok ang nanunga kay sagad sa mga player niini nanguli kay wala kuno suweldohi.
Ang atong tinubdan nagkanayon nga mibiya usab sa team ang mga sakop sa coaching staff. Tungod niini, si Marlon Zambrano, usa sa mga staff sa Cebu Classic, mao nay nangunay sa pag-coach sa team.
Sa kasaysayan man gud, kon basketball na gani ang hisgutan, ang Cebu naila sa kahanas ug kalantip niini.
Bisan gani sa mga national ug international competition, ang mga Bisaya dili sab gyud mabintahaan. Mapildi man tuod pero panington sab og bugbog ang kontra. Kana bang molaban gyud sa dungog sa iyang yutang natawhan.
Ang Sugbuanong si Willie Generalao, ang produkto sa UV Lancers nga nahimong kanhi rookie of the year awardee sa PBA, mitug-an diri kanato nga mora ra kuno og nag-warm up ang Cebu Classic.
Walay kasingkasing nga nanuwa nga mosugot na lang bisag unsa pay buhaton sa ilang kontra.
"Kon buhi pa to sila si coach Jake Rojas ug si coach Yayoy Alcoseba ambot og giunsa na kaha ni sila. Sa panahon namo, di ni puwede. Bisaya gud ta gud. Ipakita nato ang atong pagkabisaya," ni Generalao pa nga atong nahinabi pinaagi sa telepono.
Sakto gyud si Generalao. Ang Bisaya dunay dugong Lapulapu. Di magpadaugdaog. Mosukol gyud. Kahinumdom mo sa Palarong Pambansa 1994 nga nag-abot ang Central Visayas ug ang National Capital Region sa finals?
Naundang ang duwa tungod sa kagubot. Bisan pa gani og mga higanti ang gikakontra sa mga Bisaya. Wa gyud kini mosurender.
Pero niadtong Huwebes, lahi tinuoray. Apan duna say igong rason. Unsaon man nila pagkombati nga unom ra man sab sila kabuok. Unya di pa gyud sila mga Sugbuanon.
Nganong mokombati man sab sila nga wa man gani sila suweldohi sa ilang team-owner.
Ang-ang man sab og magpakamatay sila tungod og alang sa team nga wa gani mosuporta nila ang management niini.
Sa ato pa ang problema wala sa mga player kon dili anaa sa tag-iya. Ilang katungod kon unsaon nila pag-motivate ang kinatibuk-ang puwersa sa team.
Usa niini mao ang dinalian nga paghatag sa suweldo kay mao intawon ni gisaligan sa ilang pamilya.
Kon di makasugakod ang management, aw maayo siguro i-disband na lang ni kay daghan ang maamong.
Sa habig sa MPBL, unsa man say ilang action kalabot niini? Natural maapektohan ra ba gyud ang inyong lega niini.
Hinaot mahatagan nig pagtagad.