Sa Septiyembre 12 ning tuiga sa Tagbilaran City, mosaka na usab sa ring si Regie “The Filipino Phenom” Suganob alang sa usa ka away nga labaw pa sa ordinaryong boxing match.
Sa makausa pa, iya na usab ikasangka sa rematch si Sivenathi “The Special One” Nontshinga, ang South African nga maoy nakahatag sa iyang bugtong kapildihan sa professional career niadtong 2023.
Sa ilang unang panagtagbo, napildi si Suganob pinaagi sa unanimous decision. Karon, adunay higayon ang 28-anyos nga Boholano nga makapanimalos.
Dala ni Suganob ang 18-1 nga rekord ug pito ka knockouts, samtang si Nontshinga adunay 14-2 nga rekord ug 11 ka knockouts ug sa samang higayon nahimong kanhi two-time world champion.
Dili lamang panimalos ang nakataya. Ang ilang 12-round IBF light-flyweight title eliminator mahimong tiket sa modaog aron makigsangka alang sa IBF world championship.
Hapit unom ka bulan nang nangandam si Suganob alang niini nga away.
Klaro nga dili lang siya gustong makadaog kon dili gusto usab niyang ipakita nga ang iyang unang kapildihan dili mao ang kataposan sa ilang unang panagsangka.
Mas espesyal pa kini tungod kay mahitabo ang away sa Bohol, ang yutang natawhan ni Suganob. Atubangan sa iyang mga kababayan, adunay higayon ang “Filipino Phenom” nga panimaslan ang nangaging kapildihan ug mohimo og dakong lakang padulong sa iyang dugay nang pangandoy nga mahimong world champion.
Septiyembre 12 mahimong gabii sa panimalos, garbo, ug damgo ni Regie Suganob. Goodluck kanimo, Regie.
We're always behind you...