IPIL, ZAMBOANGA Sibugay - Kon hosting sa basketball na gani ang hisgutan, di na sab hibintahaan kining probinsiya sa Zamboanga Sibugay.
Tiaw mo bay ilang nadala dinhi ang mga inilang collegiate teams sa nasod aron mosalmot sa one-week competition nga mao ang 2nd Governor Ann K. Hofer Invitational basketball championships.
Kon sa miaging tuig, mga commercial teams lang ang misalmot, ning higayuna tulo gyud ka top collegiate squads sa nasod ang ilang naagni sa tinguha nga mahatagan og saktong lingaw ang mga lumolupyo ning kasaulogan sa Araw Ng Sibugay.
Ang duha ka commercial teams mao ang defending champion Alicia/KSB Glass, nga ubos sa pagdumala ni coach Chelito Caro, ug Titay’s RLT nga gipangulohan ni kanhi PBA star Paul Desiderio ug Justin Melton.
Samtang ang collegiate squads mga andam usab makigtigi mao ang kasamtangang defending UAAP Champions nga De La Salle University (DLSU) Green Archers, National University (NU) Bulldogs ug ang Cesafi champions University of the Visayas (UV) Green Lancers.
Ang matag team gitugotan nga makakuha og tag duha ka import pero dili puwede nga dunganon kini og pasulod sa samang higayon.
Gumikan kay dako-dako man usab ang cash-prize (P700,000 ang champion) nga madawat sa mga mananaug, dako usab ang tsansa nga makakuha sila og dekalidad nga magduduwa.
Mao nga way paglubad ang paghangop sa mga Sibugaynons nga mohugop sa Capitol Sports Center.
Kon kaniadto, sa television o sa social media lang nila makita ang ilang tagsa-tagsa ka mga idolo, karon mahimamat ug personal nga makapahulagway pa sila niini.
Kinsay magdahom kanila nga ang na trending sa social media sa miaging buwan nga si Mac Tallo moabot diay sa ilang dapit. Siya maoy permi agnihon sa pagpahulagway.
Si Dondon Hontiveros, ang giilang Cebuano Hotshot sa PBA, bisan tuod og ikaduha na kini niyang higayon nga nakaduwa sa Sibugay, mao gihapon ang giatngan sa fans.
Ang laing Sugboanon nga hinayhinay na usab nga nakakulit og pangalan didto sa Kaulohan nga si Steve Nash Enriquez nakakuha usab og atensiyon.
Sa dihang ang UV Lancers mipakurat sa De La Salle Univerity niadtong Huwebes, ang mga batan-ong Lancers ni coach Garry Cortes nga gipangulohan ni Zylle Cabellon kinsa maoy mibida sa kadaugan, gipanghugopan usab sa fans.
Sa habig sa La Salle, wala man tuod si Kevin Quiambao, gumikan kay nagsugod na usab ang ensayo sa Gilas Pilipinas sa Kaulohan, apan gitapuk-an usab sa mga Sibugaynon ilabi na ang 6-8 nga Fil-Am banger nga Michael Phillips.
Sa interview, si Gov. Hofer nipasalig nga ang paglingaw sa mga tawo ug ang pagpalambo sa sports maoy hatagan usab niya og prayoridad ubos sa iyang administration.
Di lang sa basketball kon dili lakip na usab ang ubang matang sa paugnat sa kusog nga maoy iyang himuong behikulo nga madasig ang turismo sa iyang local nga pamunoan.
Wa kini kalahian sa Bayugan City nga ato usab nga nakoberan sa miaging tuig. Mga UAAP teams usab ang nangapil.
Sa miaging adlaw, si coach Caro nibutyag nga nakadawat na usab siya og imbitasyon sa lungsod sa Jolo diin ang kampiyon adunay ganting P1 million.
Pastilan. Sanaol.