As usual, ang Sugbo, sa gihapon, maoy usa sa mga probinsiya nga nahimong target sa mga Manila school teams nga hagdawanan og mga player alang sa umaabot nga season sa UAAP ug NCAA.
Sa niaging Abril 9 ug 10, ang Jose Rizal University (JRU), pinaagi sa Sugbuanon ug bag-ong assistant coach nga si Edsel Vallena nipahigayon og tryouts diha sa Capitol Parish Gym sa dalan Escario, Dakbayan sa Sugbo.
Ubay-ubay usab ang misuway ug nangindahay nga mahatagan og katumanan ang ilang damgo nga makaduwa og dagkong liga ilabi na sa kaulohan.
Tuod man, nakapakita sila sa ilang tagsatagsa ka abilidad, apan daw og wa kini makakombinsi ni Coach Edsel kinsa hugot usab nga nakig-coordinate sa iyang headcoach sa kaulohan.
Sa pagkatinuod lang, daghang mga potensiyal nga nakita si Coach Edsel sa mga ni-tryouts, apan lisod alang kaniya ang pagkuha niini tungod kay aduna na may nag-akupar sa ilang position. Sagad niini mga guwardiya.
Dunay mga dagko, pero medyo alanganin usab sa ilang puwesto. Tuyo ta gyud unta ni Coach Edsel, kanhi headcoach sa Cebu Institute of Technology (CIT) Wildcats, nga makadala og Sugbuanon didto sa kaulohan. Apan lagi walay nihaom sa ilang gipangita nga posisyon.
Si Coach Edsel, dili ikalimod, nga usa siya sa mga nakatabang sa pagkakampiyon sa Mapua Cardinals sa ika-100 nga season sa NCAA sa niaging tuig.
Kini tungod kay tulo sa iyang mga player sa CIT Wildcats ang iyang gidala sa Mapua sa dihang gitangtang siya isip headcoach sa maong eskuwelahan.
Ang tulo mao sila si Lawrence Mangubat, John Jabonite, ug si Jeco Bancale. Sa unang tuig palang nila sa NCAA gisugat gilayon sila og kampiyonato ug maoy responsable sa pagputol sa 33 ka tuig nga kauhaw sa kampiyonato sa maong unibersidad.
"Siguro blessing in disguise katong pagkatangtang nako. Kay kon wa pa to, ambot og maka-title ba ang mga bata," matod pa ni Edsel kinsa mao usab ang assistant coach karon sa Abra Weavers sa nagpadayon nga MPBL 2025 Season.
Dunay panultion nga kon masirhan ka og pultahan, aduna usay moabli alang kanimo.
Mao kini ang dalan nga nasubay ni Coach Edsel, kay midangat lang og pipila ka buwan gikuha man gilayon siya sa Abra Weavers human siya mawala sa CIT.
Ug didto naumol ang iyang koneksiyon sa coaches nga maoy nahimo niyang giya nga malakip siya sa coaching staff sa JRU nga gidumala na karon ni Coach Hernani "Nanie" Epondulan.
"At least, na-proved nako nga makaangat ra gihapon ko bisan pa sa nahitabo," padayag ni Coach Edsel.
"Gusto gyud unta ko sa CIT kay mao ni ang akong alma mater. Love nako ang eskuwelahan, pero wa man tay mahimo," ni Edsel pa.
Kon kahinumduman, nagsugod og kadag-om ang coaching career ni Coach Edsel, lumad nga taga Liloan, sa dihang gisuspenso siya sa Cebu Schools Athletic Foundation, Inc. (Cesafi) tungod sa rambol nga nahitabo tali sa CIT ug sa UC Webmasters didto sa Lungsod sa Moalboal.
Apan kining tanan, alang ni Edsel, usa lang sa pagsuway sa iyang karera, ug ang paglantaw sa unahan mao na karon ang anaa sa iyang alimpatakan.
Lakip niini ang pagpadayon og giya sa pipila ka mga Sugbuanon nga adunay igong abilidad sa natad sa basketball nga misalig kaniya.
Keep up the good work, coach.