Daghan ang nasud-ipan sa nahitabo sa Game 1 sa NBA Finals tali sa Oklahoma City Thunder ug sa Indiana Pacers niadtong Huwebes.
Ang Thunder nga maoy inilog ning maong serya nagpakita sa ilang saktong dominasyon ug gipamatuod kon nganong angayan lang sab gyud sila nga mamahimong title-favorite batok sa Pacers.
Apan sa kalit lang, daw og sa nabali ang hapak sa hangin human sila gipakaging ni Tyrese Haliburton.
Si Haliburton miaswat sa Pacers ngadto sa 111-110 nga kadaugan pinaagi sa iyang 2-point jumper sa katapusang 0.3 segundos aron sakmiton ang bintaha sa best-of-seven series, 1-0.
Sakit-sakit ang nasinati sa Thunder gumikan kay kontrolado unta nila ang duwa sulod sa 45 minutos nga gani nakaposte pa sila og 15 puntos nga labaw.
Apan nakawang lang ang tanan sa dihang ang Pacers nipabuto og 12-2 nga rally sa naghinapos nga bahin nga gisumpayan sa bayanihong itsa ni Haliburton nga maoy nakapahilom sulod sa Paycom Center.
Dili bag-o alang ni Haliburton ug sa Pacers ang susama niining sitwasyon sa playoffs diin mabiyaan sila og 15 puntos apan makagukod gihapon og modaog sa duwa.
Sigon sa natala, kalima na kini nila gibuhat diin upat usab ka higayon nga si Haliburton maoy namayani.
Labing siguro, ang kapildihan sa OKC sa Game One naghatag og leksiyon nga magamit nila sa Game Two (Lunes sa buntag sa Pilipinas) aron tablahon ang series, 1-1.
Sa first half sa Game One, napakita sa Thunder ang kaepektibo sa ilang depensa nga miresulta sa 20 ka turn overs sa Pacers.
Pero daw og sa wala kini nila mapahimusli og maayo gumikan kay sa 20 ka turn overs, siyam lang ang nakonberter niini.
Bisan gani si Thunder coach Mark Daigneault gisayangan sa mga oportunidad ug nitumbok nga usa kadto sa mga rason sa ilang kapildihan.
Si Shai Gilgeous-Alexander, sa makausa pa, nipakita na usab sa kalidad sa usa ka Most Valuable Player (MVP) awardee ug nitali og 38 puntos, lima ka rebounds, tulo assists ug tulo ka steals.
Ang 38 puntos, sa kasaysayan, maoy ikatulong pinakataas nga individual score sa usa ka player nga premirong nakataak sa finals.
Apan wa kini magpasabot nga inusara niyang maaswat ang Thunder. Sa gihapon nakinahanglan siya og igong suporta gikan sa iyang kauban.
Expect an explosive Thunder in Game 2.