CEBU, Philippines - Di lang kay bongga kon dili mikulit pa gyud og kasaysayan ang opening sa 2024 Paris Olympics niadtong Sabado, Hulyo 26, 2024 (oras sa Pilipinas).
Kasaysayan gumikan kay kadto maoy unang opening ceremony sa matag upat ka tuig nga sports competition sa tibuok kalibutan nga gipahigayon gawas sa stadium gumikan kay didto man kini himoa sa dakong wanang nga sapa nga mao ang River Siene sa northern part sa France.
So, liboan ka mga Olympians nga nagrepresentar sa ilang tagsatagsa ka mga nasod ang misalmot sa parada nga sakay sa managlahing bote o sakayan nga nagwarawara ngadto sa ilang mga dumadapig.
Ang surprisang presensiya ni Celine Dion ug ingon man kang Lady Gaga maoy mipahugyaw sa mga misaksi.
Ang floating Olympic dili lang kay talagsaon kon dili usa kini ka eco-friendly tungod kay ang siga niini siyento por siyento man nagagikan sa elektrisidad nga ginama sa tubig ug solar light, sa ato pa walay gasolina nga gigamit niini.
Ang atong gihisgutan sa unahan maoy pipila lang ka mga makapaukyab nga dayan-dayan ning pagsugod sa ginaatngan sa kadaghan nga Paris Olympics.
Ug tungod niini, ang mga organizers sa 2028 Olympics sa Los Angeles naghunahuna karon kon unsaon nila nga malabwan o matupngan ang kabunga sa 2024 Paris Olympics.
Ang LA naka-host sa Olympics niadtong 1932 ug 1984 nga diha ipahigayon sa Los Angeles Memorial Coliseum ug SoFi Stadium. Posibling dunay kausaban sila nga himoon sa 2028.
Ang 2024 Olympics maoy ikatulong higayon nga na host sa Paris. Ang una niadtong 1900 ug ang ikaduha sa tuig 1924.
Samtang mokabat ngadto sa 28 ka mga Filipino athletes (unom niini sa Paralympics) ang mopakita og aksiyon sa Paris Olympics.
Duha niini mga Sugboanon nga mao sila si John Ceniza ug Elreen Ando. Actually tulo sila sa weightlifting ug ang ikatulo mao si Vannesa Sarno sa Bohol.
Ang weightlifting maoy usa sa mga events diin potensiyal nga makakuha og gold medal ang Pilipinas.
Sa niaging Olympics sa Tokyo, Japan ang weightlifter nga si Hidilyn Diaz maoy unang Filipino athlete nga naka gold alang sa nasod.
Ang laing gitutokan nga mosunod ni Diaz mao sila si Eumir Marcial, Nesthy Petecio ug Carlo Paalam sa boxing, Carlos Yulo (gymnastics), EJ Obiena (pole vault).
Si Abraham “Bamboo” Tolentino, ang presidente sa Philippine Olympic Committee (POC) malaumon nga ning higayona malabwan sa Pilipinas ang ilang performance sa Tokyo.
Goodluck to all.