Human sa hugot nga pagbansay-bansay dinhi sa Sugbo, mogikan na karong adlawa si Filipino world boxing champion Melvin Jerusalem paingon sa kaulohan.
Si Jerusalem modepensa sa iyang World Boxing Council (WBC) minimum weight title batok sa undefeated Mexican fighter nga si Luis Castillo nga gikatakda sunod Dominggo, Septiyembre 22, 2024 didto sa Mandaluyong.
Sa miaging semana, atong nadalikyatan sa makadiyot ang subsob nga ensayo ni Jerusalem uban sa iyang team diha sa Zip Boxing and Wellness Center sa Banawa, dakbayan sa Sugbo.
Sa atong interview, si Jerusalem ug ang headcoach niini nga si Michael Domingo siyento por siyentong masaligon nga madepensaan nila ang kampiyonato ilabi na kay ang away ania dinhi sa Pilipinas.
Dili kini maoy unang higayon nga nakadepensa sa iyang world title si Jerusalem.
Kon kahinumdoman, niadtong Mayo 28, 2023, sa unang higayon gidepensaan ni Jerusalem ang iyang World Boxing Organization (WBO) title batok sa Puerto Rican nga si Oscar Collazo.
Ang away didto gipahigayon sa Fantasy Springs Casino sa Indio, California.
Maayo unta nga nakasugod si Jerusalem sa iyang away apan sa kalit lang miawop ang iyang kaagresibo ug mibanos ang kaluya nga maoy nakapadasig sa Puerto Rican fighter.
Ug tuod man, diha sa ikapito nga round wala na makasugakod pa si Jerusalem ug napugos na kini sa pag-isa sa puting bandera.
Usa sa gitumbok nga rason kon nganong nahutdan sa hangin si Jerusalem mao ang klima. Wa siya maanad sa kabugnaw sa Amerika ilabi na kay hamubo ra ang iyang pag-istar sa Estados Unidos.
Posibling kompiyansa ra sab siguro kaayo siya atong higayona kay si Collazo gud bagito pa kaayo sa iyang pagka professional fighter.
Tiaw mo bay kaunom pa ni maka away nga may upat ka knockout (6-0) kon itandi sa iyang 22-2 nga record .
Batok ni Castillo karong umaabot Domingo, si Jerusalem mosaka sa ring nga mediyo makabaton og gamayng pabor.
Anaa niya ang suporta sa crowd, unya dili na usab problema niya ang pag-adjust sa klima. Ug ilang gipaniguro nga dili na mahitabo ang nahitabo kaniadto.
Gikatakda usab nga moabot si Castillo sa Manila karong adlawa. Gikan sa Mexico mobiyahe pa kini sa Japan ug didto manukad paingon dinhi sa nasod.
Walhon si Castillo hinungdan nga pulos usab walhon ang gika-sparring ni Jerusalem sa iyang training dinhi sa Sugbo.
Sa gitas-an, lamang ang 27 anyos nga Castillo, 5-5 1/2 samtang si Jerusalem 5-2 lang.
Pero ato sab nga nabantayan, nga mga dagko ug tag-as usab ang perming ika-engkuwentro ni Jerusalem sa iyang mga sparring sessions.
Good luck Melvin aka Gringo. Goodluck Pilipinas.