Human kulataha sa Ilagan Isabela Cowboys, 80-66, niadtong Hulyo 17, ang Cebu Greats bangis nga mitimbakawas gikan sa ilang kapildihan ug gitipi ang inilog nga Gensan Warriors, 100-96, niadtong Sabado, Agusto 2.
Wa man tuod makaduwa ang usa sa ilang beteranong sinaligan nga si JR Quinahan, apan lantip nga mitubos kaniya ang iyang mga kauban nga gipangulohan nila ni Mark Meneses ug Jun Manzo.
Double-double performance ang napakita ni Meneses kinsa mitali og 23 puntos ug 15 ka rebounds samtang ang flashy pointguard nga si Manzo mipakatap usab og 23 puntos ug unom ka assists.
Doubling numero usab ang nahagpat nila ni Jan Jamon (13 pts., 5 ka rebounds) ug Alvin Baetiong (11 pts., 6 rebs.) samtang otso puntos ang natampo sa laing bigman nga si Dolan Adlawan.
Kini nagpakita nga balansi nga ataki ang gihimo sa mga batos ni coach Junthy Valenzuela, ug kon wa ko masayop kini maoy unang higayon nga upat ang naka-double figures sa ilang scoring department.
Misulod sa korte ang Cebu Greats nga dakong biya. Kini tungod kay ang Gensan impresibong nag-akupar sa ikalima nga luna sa South Division dala ang 13-8 nga karda samtang ang Cebu Greats, (6-15) anaa sa ika-13 nga puwesto sa susamang division.
Tungod sa mga injuries nga mihasol sa team, si coach Junthy epektibong migamit sa iyang 11 ka mga players.
Gawas kang Quinahan, wa usab makaduwa sila si Paolo Hubalde, Ken Holmqvist ug Isiah Hontiveros.
Si coach Junthy, mitug-an nga walo na lang ka duwa ang nahabilin nila sa elimination round. Ug sa walo, kinahanglan modaog sila og kapito aron makapatong sa ikanapulo nga puwesto ug sa samang higayon makapugnit og tiket alang sa playoffs.
Malisod man tuod nga tahas, apan nagpabilin ang ilang paglaom tungod kay gihulagway ni coach Junthy nga dili ra kaayo lig-on ang nahabilin nilang mga kontra.
"Yes Pre. Eight games ang nahabilin dapat modaug mi ug pito. Dili naman sad kaayo lig-on ang nahabilin. Gamay nalang nuon ug chance nga makasulod sa next round," matod pa ni coach Junthy.
Sunod ikakontra sa Cebu Greats ang Marikina Shoemakers (4-17) karong Agusto 7 sa Cuneta Astrodome.
Kon hatagan og kahigayonan nga makasulod sa playoffs, laraw sa management sa Cebu Greats nga mo-host og duwa dinhi sa Sugbo.
Kini maoy gibutyag sa ilang team manager nga si Jhon Santos.
Actually, una nilang plano mao nga ilang dad-on ang duwa sa team dinhi sa Cebu sa Septiyembre, apan gumikan sa mga kakulian wala lang una nila ihinayon.
"Dapat meron kaya lang nagkaroon ng problema kaya na cancel. Hoping magawan namin ng paraan na makapasok sa playoffs, sana makapag homegame kasi yan din ang gusto namin madala yung team sa Cebu," matod pa ni Santos.