So, kompirmado gyud nga dili standard ang oval sa Cebu City Sports Center (CCSC), ang main venue sa athletics event sa Palarong Pambansa 2024.
Kini human masuta nga kuwang og dos metros ang gidak-on niini (dili 20 metros nga unang nigawas sa mga balita) ug wala makaabot sa Olympic 400-meter size nga mao gyuy standard sa kompetisyon. Buot ipasabot nga 398 meters lang ang sukod sa oval.
Mismo ang assistant secretary sa Department of Education nga si Francis Cesar Bringas maoy mikompirmar niini atol sa press conference sa CCSC media center nga gipahigayon kagahapon, Hulyo 13, 2024.
Iyang giingon nga gumikan niini, ang tanang mga records sa pipila ka mga event ilabi na niadtong mga nakatala o nakabuak og mga record temporaryong dili una i-recognized sa Philippine Athletics Track And Field Association (PATAFA) hangtod nga dili pa mahatagan og solusyon kining maong problema.
Ilang gitug-an nga adunay third party nga mosukod og balik sa oval aron pagtino gyud sa kamatuoran.
Pero ambot og unsay epekto niining giingon nilang third party, nga ang official nga ahensiya nga makadeklarar niini kon substandard ba o dili ang maong oval mao ra gihapon ang Patafa nga sa sayo pa, maoy nagbutyag sa maong kontrobersiya, base sa unang nikatap nga mga balita.
Ning pagtumaw sa kontrobersiya mas daghan ang pangutana kay sa tubag kon nganong nahitabo.
Nganong gipadaug man ang Cebu City sa bidding nga substandard man kaha diay ang oval niini?
Ang bidding gipahigayon, kon wa ko masayop, sa sayong bahin sa miaging tuig pa ug nahibaw-ang ang Cebu City nga nidaug sa tunga-tungang bahin sa miagi gihapong tuig. So, posibling nakahibawo na daan ang technical officials sa Palaro sa maong problema.
Nganong karon ra man nila kini gibutyag nga nagpahigayon na sa kompetisyon nga nahimo na hinuong sensitibo ug kontrobersiyal ang maong issue?
Sa sitwasyon karon, mora man og nagtudtud ang Department of Education (DepEd) ug ang contractor sa pag-resurface sa oval kon kinsay angay nga basulon nila niining problemaha?
Basically, kining contractor igo ra gyud ni mosunod kon unsay anaa sa plano o blue print nga gihatag sa nagpa-construct, pero og nagbuot-buot ra gani ni sila nga wa masubay sa plano, natural lang nga sila gyud ang manubag.
Apan og igo lang silang nituman, aw dunay laing manubag ug labing siguro ang taga DepEd kinsa maoy nagdumala sa Palaro kay sila man ang frontline ning maong kalihukan.
In fairness, ang Cebu City kansang papel mao ra gyud intawon ang pag-host sa tinuig nga labing dakong kompetisyon sa sports sa nasod way labot niining problemaha kay sa technical aspect man lagi ni.
Pero di malikayan, nga ang Dakbayan maoy dakong maapektuhan ug mauwawan sa kapalpakan. Hinaot mahatagan kinig kasulbaran.