Laing Sugbuanon ang gitahasan ug gisaligan sa usa ka dakong eskuwelahan didto sa kaulohan nga maoy modala sa ilang basketball program sugod karong tuiga.
Ang buot nakong ipasabot mao kini si Robert Raymond Labagala kinsa lumad nga taga Dakbayan sa Talisay nga mao na karon ang gitudlo nga headcoach sa San Sebastian College (SSC) Stags alang sa ika-101 Season sa National College Athletic Association (NCAA).
Wa kaayo ni siya makakulit og pangalan dinhi sa Sugbo kay didto man gyud ni siya magbasehan sa Manila ilabi na sa iyang pagtungha sa kolehiyo.
Kon wa ko masayop, nakaduwa lang siya og pipila ka tuig sa University of the Visayas (UV) Baby Lancers.
Didto na nakuha siya sa University of the East Red Warriors pero limitado ra sab kaayo ang iyang oras. Usahay mabangko pa gyud siya.
Pero bisan pa niini, daghan ang nasurprisa sa dihang niapil kini sa drafting sa Philippine Basketball Association (PBA) niadtong 2010 ug gikuha siya (12th overall pick) sa Ginebra, ang pinaka-popular nga team sa nasod.
Dinhi nautingkay ug nasayran sa kadaghanan nga lumad diay siyang taga Talisay City, Cebu.
Dihay usa ka higayon nga nakahimamat ko aning bataa uban sa iyang papa nga nagtan-aw og duwa, (kon wa ko masayop) sa Talisay City Mayor's Cup. Labing siguro produkto usab ni siya sa Gullas Cup.
Mapaubsanon nga manulti unya humble nga pagkatawo.
Mubo ra man tuod ni siya (5'7) pero masabot nga taas taas siya og IQ sa basketball ug ang iyang speed maoy usa sa iyang puhonan.
Human sa Ginebra, nakaduwa usab siya sa Barako Bull Energy ug ingon man sa Talk N' Text diin niya nakuha ang iyang unang championship.
Sa kasamtangan, anaa siya nanimuyo sa Navotas, ang lugar sa iyang asawa diin aktibo usab siya sa sports alang sa mga kabatan-onan.
Gihulipan ni Labagala sa San Sebastian isip headcoach si Arvin Bonleon kinsa iya ra usab nga gikuhang usa sa iyang mga assistant.
Naikag ko sa pagsuwat niini, kay sa samang higayon, si Labagala nalakip usab sa coaching staff sa Basilan Viva Portmasters sa Maharlika Pilipinas Basketball League (MPBL) diin iyang gikauban ang lain usab nga Sugbuanon ug atong higala nga si coach Chelito Caro.
Interestingly, si Caro maoy gitahasan usab karon nga modala sa programa sa high school team sa San Sebastian.
Si Caro nagsugod og kulit sa iyang pangalan pinaagi sa social media ilabi na sa dihang siya ang nagdala sa CM Farm ug uban pang mga panalay teams sa Mindanao nga sunodsunod niyang napa-champion.
Gawas sa Basilan ug sa San Sebastian high school team, si Caro nalakip na usab sa coaching staff sa Blancas Golden Knights sa Davao.
Si Labagala ug si Caro maoy pipila lang ka mga Sugbuanong coach karon nga hinayhinayng mikulit og pangalan sa kaulohan.
Ug kita sayod nga aduna pay daghang sumosunod. Goodluck, guys.