So, hayag ang posibiidad nga adunay kausaban sa lineup nga ipasunod sa Gilas Pilipinas alang sa umaabot nga mga qualifying rounds sa Fiba World Cup.
Kini gibase sa evaluation nga gihimo sa team human sa lain na usab nilang kapakyasan sa Fiba Asia Cup 2025 diin gipalagpot ang Gilas sa Australia sa quarterfinals round, 80-64.
Wala pa man tuod mabutyag kon kinsa ang magpabilin ug kinsa usab ang mga bag-ong mahisakop sa team apan ang labing siguro sa Nobiyembre 28 moduwa na usab kini sa laing quailifiers batok sa Guam sa Group A.
Magbawos-bawos og host ang Gilas ug ang Guam ning maong series kay sa Disyembre 1, ang Guam na man sab ang mo-host sa Pilipinas.
Kon kahinumduman, ang Piipinas nakasulod na sa World Cup sa tulo ka higayon - 2014 sa Seville, Spain, 2019 sa Foshan, China ug sa 2023 diin ang Pilipinas usa sa co-host countries sa Fiba World Cup uban sa Japan ug Indonesia.
Mopakita usab og aksiyon ang Gilas sa Southeast Asian Games sa Disyembre sa Thailand, pero lain ang molangkob sa team sanglit dili man available ang mga PBA ug overseas players niining panahona.
Hinuon makaduwa gihapon si Justine Brownlee tungod kay naatol man nga All-Filipino conference ang PBA ning buwana.
Magtapok og balik ang mga original pool sa Gilas alang sa World Cup qualifiers sa Pebrero 26 ug Marso 2 sunod tuig diin ning higayona ilang ikasangka ang New Zeland ug Australia.
Kining duha pulos yanong mipukan sa Gilas sa niaging Asia Cup. Apan sa gihapon, mangambot na lang ta kon makabawi ba ang Gilas sa ilang kapildihan.
Salikwaot kaayo paminawon nga ang New Zealand ug Australia, gawas nga adunay bintaha sa gitas-on ug gidak-on, migahin usab sila og saktong preparasyon, samtang ang Gilas sa sunod tuig pa magsugod pagbalik sa ilang praktis.
Human kulataha ug palagputa ang Pilipinas sa Australia sa niaging semana, mitumaw gilayon ang panawagan nga ilisan ang coach ug hulipan ang mga players nga wala kaayo magamit.
Nindot ang tumong sa maong panawagan kay ang kadaugan man maoy katuyoan niini, pero por Diyos por Santo bisan kinsa pa siguro ang ilang ihulip o idugang sa team, wa gihapoy mahitabo kay sa pagkatinuod lang, ang sakto ug hataas nga preparasyon mao gyuy maghatag og maayong resulta.
Mahitabo lang kini kon mo-adjust ang PBA sa ilang schedules o kaha itugot sa mga PBA team nga hatagan sa ilang mga player og prayoridad ang praktis sa Gilas nga naglakip sa international tuneup games or tournament sulod sa hataas nga panahon.
Kay kon dili, kutob ra gyud ta sa dagandagan sulod sa korte. Mao ni ang realidad. Just saying.