Migallen: Nuggets mibawos; way panilhig nga mahitabo

Taymp pa
Migallen
Migallen

Sukwahi sa gituohan sa uban, walay panilhig nga mahitabo sa semifinals series tali sa defending champion Denver Nuggets ug Minnesota Timberwolves sa Western Conference sa NBA.

Kini human gibawsan sa Nuggets ang Timberwolves sa Game 3 diha mismo sa ilang korte sa Minnesota.

Hinuon nagpabilin gihapon nga naglabaw ang T-Wolves sa series, 2-1, apan sa gipakita nga adjustment sa Nuggets kagahapon, napanglantawan nga motaastaas pa ang dagan sa serye.

Wala na kapatuyang ang mga batan-ong Timberwolves sa ilang run-and-gun nga duwa hinungdan nga napug­ngan ang ilang opensa.

Kon 70 puntos ang nahimo ni Anthony Edwards sa unang duha ka duwa, sa Game 3 igo ra kining nakapugnit og 19 puntos.

Unya si Karl-Anthony Towns nalimitahan sab ngadto sa 14 puntos.

Samtang sa habig sa Nuggets, si Nikola Jokic, sa naandan ha­pit na sab maka triple-double human siya nikulit og 24 puntos, 14 ka rebounds, siyam ka assists unya dunay pay tulo ka steals ug tulo ka blocks.

Si Jamal Murray nga otso puntos ra sa Game 2, mipabuhagay og 24 puntos usab.

Ang statistics nagpakita nga ang dakong adjustment sa Nuggets dia masentro sa depensa kay napugdol man og kalit ang opensa sa Timberwolves.

Kini maoy unang kapildihan sa Timberwolves sa nagpadayon nga playoffs kay ila mang gi-sweep ang Phoenix Suns sa first round.

We’ll see kon unsay adjustment sa Minnesota sa Game 4 nga anha gihapon sa ilang korte duwaon.

Sa mga sugarol, daghan ang nalipat sa mga nikatap nga fake news sa social media.

Duna man guy nag-post nga mga pages sa Facebook nga gisuspenso kuno si Murray sa Games 3 ug 4 tungod kay milabay kini og heat pack sa tunga sa korte sa Game Two.

Pastilan ning mga tiggama og news nga bunga lang sa ilang imahinasyon o kaha paglingla lang sa katawhan.

Aron malikayan ning ingon ani, kon duna moy mamatikdan nga mga pages nga mohimo og mga peke nga news, maayo siguro inyong i-block og dritso.

Mao nay akong gibuhat karon kay wala gyud tay makuha nga tarong information. Naglangaylangay lang na sa panahon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph