Kon way kausaban sa dagan, mobalik pagsaka ibabaw sa ring si Manny Pacquiao nga usa ka underdog o biya batok ni Mario Barrios sa ilang world title fight karong Hulyo 19, 2025 didto sa MGM Grand Garden Arena sa Las Vegas, Nevada.
Duha ka buwan pa man tuod sa dili pa ang away, apan ang betting odds nagpakita nga dakong biya sa pustada ang Filipino boxing star.
Sa pag-abli pa lang sa usa ka betting outlet didto sa Las Vegas, ang mopusta ni Pacquiao plus 340 ang modaog samtang kadtong mopabor ni Barrios minus 500.
Sa ato pa, kon mopusta ka og $1,000 ni Pacquiao, kon modaog makakobra ka og $1,340, pero kon mopusta ka og $1,000 ni Barrios, makakobra ka lang og $500 kon modaog.
So, kon dinhi pa ni sa atoa, dako-dako gyud ning logruha.
Napangagpasan man gud sa pipila ka mga boxing analyst ug kadtong mga boxing bettors nga malisod nga tahas ang sagubangon sa 46-anyos nga Pacquiao batok sa 30-anyos nga Barrios tungod sa duha ka rason.
Una, ang pangidaron ni Pacquiao, ug ang ikaduha mao usab ang kahaw-ang sa hataas nga katuigan nga siya wala na makaaway.
Si Pacquiao (62-8-2, 39KOs) wala na makaaway sukad niadtong Agusto 21, 2021 sa dihang napildi siya ni Yordenis Ugas pinaagi sa unanimous decision.
Motangkod nga 42-anyos pa siya niadtong tuiga ug usa ka buwan gikan sa iyang kapildihan, nianunsyo kini nga moretiro na sa pamoksing.
Samtang si Ugas (27-6, 12), duha ka tuig human sa iyang kadaugan ni Pacquiao nakigsangka ni Barrios kinsa adunay record nga 29-2-1, 18KOs.
Sa maong away, way porsiyento nga gidag-an si Ugas ug gitumba pa kini og kaduha ni Barrios aron sakmiton ang unanimous decision nga kadaugan nga maoy nakapahimo niyang interim champion.
Sa ato pa, yano ra kaayong gikulata ni Barrios ang tawo nga nakapildi ni Pacquiao.
Dili man tuod tanan mosubay sa susamang subok, pero sagad sa panultion mopunting gyud sa giingon nga yano ra man gani niyang gipildi si Ugas unsa pa kaha ni si Pacquiao.
Kadto maoy nakapahimo ni Barrios nga interim WBC welterweight champion.
Gideklarar siya nga regular WBC champion sa dihang gibiyaan ni Terence Crawford ang welterweight title aron mosaka kini ngadto sa junior middleweight division.
Nadepensaan ni Barrios ang korona batok ni Abel Ramos niadtong Nobiyembre 15 nga miresulta sa panagtabla. Sa maong away, si Barrios ug si Ramos nagpulipuli og katumba ug swerte nga nitapos sa usa ka split draw nga desisyon ang panagsangka. Natabla.
Buot ipasabot nga dili kaayo kahadlukan nga moaway si Barrios ug kuwang pa kaayo siya sa kahanas ug kasinatian sa championship fight
Apan sa upat ka tuig nga si Pacquiao wala makaaway ug ingon man ang iyang bating performance batok ni Ugas maoy usa sa mga butang nga di nato ikasurprisa kon nganong biya o underdog ang gitawag og Pambansang Kamao batok ni Barrios.
Pero wala kini magpasabot nga ang pagka underdog ni Pacquiao nagpapas sa iyang kahigayonan nga makabira og surprisang kadaugan.
Kini tungod kay sa tulo ka mga world champions sa welterweight division, si Barrios maoy labing haom niyang ikontra tungod kay siya man ang adunay ubos og kalidad kon itandi sa laing duha.
Kini mao sila si Jaron Ennis kinsa maoy naghupot sa IBF ug WBA title, ug Brian Norman Jr. nga mao usab ang nanag-iya sa WBO welterweight belt.
Ang duha pulos undefeated, unya mahulagway nga mga knockout artists pa gyud.
Si Ennis naghupot og 34-0 nga baraha diin 30 niini gipang-knockougt, samtang si Norman Jr. mitali og 27-0 nga record nga may 21 ka knockouts.
Kay kon kini pa hinuon, bisan asa sa duha, mao pay nakontra ni Pacquiao, mas maayo pa siguro nga maglana na lang tag potot.
Pero kay si Barrios man, it's going to be a 50-50 chance.
Kinsay nasayod nga sama sa ubang mga fighter, si Pacquiao, taliwala sa iyang pangidaron, aduna pay nahabilin ug katapusang ikabuga nga posibling makadugang sa iyang legasiya sa boxing.
Mao usab kini ang pangagpas ni Terrence Crawford.
“Mario Barrios is a great match-up for Manny Pacquiao, and I think at this age it’s a 50-50 fight for Manny Pacquiao,” ni Crawford pa.
We'll see the scattered. (Tan-awon nato unsay katag).