Hisgot-hisgot karon sa mga nagsunod sa basketball sa nasod kining pagtandi sa Philippine Basketball Association (PBA) ug sa Maharlika Pilipinas Basketball League (MPBL).
Di gyud kini malikayan ilabi na kay magdungandungan man gud ang ilang schedules sa mga duwa.
Unya daghan na sab ang nakabantay nga mas gidugok man hinuon ang MPBL kay sa PBA, base sa mga linawas nga mitan-aw o katong mga misaksi gyud sulod sa arena.
Pero kon magtandi man gani, dili angay basehan kining crowd sulod sa coliseum o sa arena. Kini gumikan kay dako man kaayo og deperensiya kon pulta o bayad ang hisgutan.
Mahal ang entrance fee sa PBA samtang sa MPBL halos gani mora na og i-libre alang sa publiko. So, way kapasikaran.
Mas lig-on siguro nga himuon basehan sa pagtandi ang social media. Adto masukod sa gidaghanon sa views sa ilang tagsa-tagsa ka live streaming nato maaninaw kon asa gyud sa duha ang gihangop karon sa publiko. Kay sa live streaming gud pulos man libre ang motan-aw niini. Internet o load ra sa cellphone ang gikinahanglan. Di ba?
Pero sa pagkatinuod lang sab, ako mismo nakaobserbar nga daghan nang wala kauyon sa PBA karon. Gusto na og laing alternatibo.
Permi na nato mabasahan ang mga negatibong komento batok sa maong liga nga lisod alkontrahon kay aduna may igo ug lig-ong basehanan.
Unsaon man nato pag-alkontra kon dunay moingon nga duha ra ka kampo ang magsigi og balik-balik og abot sa finals o kaha magpuli-puli og ka champion sa matag conference. Buot ipasabot ang teams sa Group of Companies ni Manny V. Pangilinan (MVP) ug ang San Miguel Corporation (SMC) ni Ramon S. Ang.
Maglisod tag debati kay tinuod man sab gyud.
Ubos sa MVP mao ang Talk N’ Text, Meralco Bolts ug NLEX Warriors, samtang ang SMC aduna pu’y San Miguel Beer, Ginebra San Miguel ug ang kanhi Purefoods nga karon mao na ang Magnolia Chicken Templados.
Wa pa ni labot sa giingon nga sekretong farm teams sa duha ka corporate rivals.
So di kita kabasol kon dunay mga pagduda nga motumaw nga basin magsabotsabot lang kay usa ra lagi ang tag-iya.
Mao sab ni rason kon nganong motumaw ang kontrobersiya kon dunay binayloay og players nga tan-aw sa kadaghanan dili makiangayon.
Sa MPBL, dali kini nga makahagpat og crowd tungod kay makamasa ang dating. Nagdala sa ngalan sa local government unit (LGU) hinungdan nga regionalistic ang iyang fanbase, bisan tuod og dili taga diha ang ilang ubang mga player.
Naay mga ginagmay’ng kasikas pero dili mahulagway nga dunay gipaboran. Ang home-and-away format maoy naghatag og timaan nga ang mga duwa gipaduol ngadto sa publiko.
Dunay 30 ka mga team ang MPBL, sa ato pa, daghang mga players ang nahatagan og tsansa. Ug natural makaani usab kini og daghang dumadapig. Mao ni nakabintaha sa bag-ong liga nga giugmad ni kanhi senador ug boxing superstar Manny Pacquiao.
Hinuon kon kalidad sa mga player ang hisgutan, layo ra ang MPBL kon itandi sa PBA. Financially stable sab sila kay gilangkuban man kini og mga dagkong kompaniya.
Pero kon magpatu’gto’g gani sila sa pansitan ug dili gihapon nila maayong pagkadala ang liga, kinsay nasayod nga tingalig mawani sila sa MPBL
○ ○ ○
Nakamatikod na ang PBA ning nagkahupas na nilang crowd karon. Dili pa man tuod uwahi ang tanan pero kinahanglan mohimo na sila og mga alternatibong lakang aron makabig og balik ang simpatiya sa kadaghanan.
Manghinaot ta nga way motikyaob niining duha ka lega kay sa nasod kabahin na usab kini sila sa ekonomiya. Pulos kini nakamugna og daghang trabaho.
At least, nakita ang positibo’ng aspeto. Nga kining duha ka liga mahimo ra diay’ng mo-exist sa samang higayon.
Kon ang PBA pang high level nga entertainment sa basketball, ang MPBL mao usab ang liga alang sa masa. Mao ni nakanindot. Nakita nato ang positibo’ng butang ning pagkopetensiyaay sa PBA ug MPBL.