So, pormal nga gilusad kagahapon ang 1st V-League Visayas leg pinaagi sa usa ka press conference sa Quest Hotel, Dakbayan sa Sugbo.
Sa pagkatinuod lang, taudtaod na kining gihandom sa mga Sugbuanon nga makakita og dekalidad nga volleyball tournament dinhi sa tugkaran sa Sugbo ug tuod man, sa kadugayan, gidungog ang maong pag-ampo.
Mga dagkong opisyal sa Premier Volleyball League (PVL) didto sa kaulohan nga gipangulohan ni Ricky Palou ang tuyong mianhi sa Sugbo aron pagtambong sa paglusad sa maong kompetisyon nga pagatigian sa mga unibersidad sa Sugbo.
Ang torneyo pagasalmutan sa Cebu Institute of Technology University, University of Cebu, University of San Carlos, University of San Jose - Recoletos, University of Southern Philippines Foundation, ug University of the Philippines.
Si Ken Silverio Ucang kinsa taga Mindanao apan didto magbasehan sa Manila maoy Commissioner sa Visayas leg.
Giangkon ni Ucang nga kay lagi una pa man ni nilang Visayas league unom pa ka mga team ang ilang gipangimbitar apan sa sunod tuig hayan ilang palapdan ang imbitasyon.
Wa usab nila isalikway ang pag-imbitar sa mga team gikan sa ubang isla sa Visayas Region.
Target sa PVL mao ang pagpadako sa liga sa tibuok nasod ug kini maoy magsilbing lakang nga ilang gitikang.
Mga team sa Cebu Schools Athletic Foundation, Inc. (Cesafi) man tuod ang mga misalmot pero dili kini komplikasyon sa Cesafi league tungod kay gi-simplify ra man nila ang kuwalipikasyon sa mga player.
At least, enrolled lang sa school ang players, mahimo na siya makaduwa.
Sa Cesafi tournament man gud mobase ang screening committee sa grado sa players ug sa number of playing years niini.
Sa ato pa mas dekalidad nga aksiyon ang atong masaksihan.
Tulo ka venue ang duwaan sa kompetisyon. Kini ang USJ-R gym, USPF, ug USC gyms.
Higayon na ni nato nga makakita og dekalidad nga volleyball matches sa men's ug women's division.
Kini sugdan sa Hulyo 6.
Goodluck, guys.