Sa tinguha nga mahibalik ang pagsalig, garbo ug dungog, mga beterano ug inilang basketbolista sa Sugbo ang mo-reinforce sa Cebu Classic alang sa nagpadayong 2025 Season Maharlika Pilipinas Basketball League (MPBL).
Dili pa man tuod hitsas ang tanan, apan ubos sa bag-ong team-owner nga si Sam Lato, ang management sa Cebu Classic mokuha sa serbisyo sa mga ex-PBA players nga sila si J.R. Quiñahan, Reed Juntilla, ug Paul Desiderio.
Gawas sa tulo, anaa usab ang bigman nga si Reeve Ugsang ug flashy pointguard nga kanhi produkto sa University of the Visayas ug sa University of the Philippines (UP) nga si Jun Manzo.
Matod pa sa atong tinubdan, nga target usab karon sa management ang serbisyo sa Sugbuanong shifty pointguard nga si Mac Tallo kinsa sa kasamtangan anaa sa Pangasinan.
Si Quiñahan gikatakda nga molarga karong Lunes ug posibling mosunod usab si Juntilla. Si Ugsang migikan na usab.
Atoa na usab didto sa kaulohan sila si Manzo ug Desiderio.
Pipila usab ka mga player nga namiya kaniadto ang namalik na usab sa team. Kini sama nIla ni Paulo Hubalde ug Darry Dominguez.
Ang mohingpit sa team nga gituohang makahatag na unya og saktong kombati mao sila si Brylle Mecca, Mark Meneses, Boomboom Tampus, Jan Jamon, ug Dolan Adlawan.
Anaa usab kanila si Lean Martel ug ang higanti nga kanhi usab PBA player nga si Ken Holmqvist.
Karong Martes, Hunyo 24, ang Cebu Classic nga ubos na sa pagdumala ni kanhi PBA star Junthy Valenzuela mosakbang sa Pampanga Giant Lanterns sa Alonte Sports Arena sa Binan, Laguna sa alas 8 ang takna sa gabii.
Ang Cebu Classic sa kasamtangan adunay 4-12 nga record ug nahimutang sa ika-23 nga luna samtang ang Pampanga Lanters anaa usab sa ikalima nga puwesto sa overall standing nga may 12-4 nga baraha.
Alang ni Valenzuela nga wa man tuod kaayo siya maglaom og dako sa team gumikan kay bag-o ug dili pa kaayo sila kasinati sa matag usa, apan wa usab niya isalikway ang positibong resulta alang sa team.
Dako ang pagsalig ni Junthy sa team tungod kay siya sayod kon unsa ang kalidad ug unsa ka warrior ang Sugbuanon.
Goodluck, guys.