Kon maghisgut na gani og Skate Park, di gyud nato malikayan nga mosantop sa atong huna-huna ang dakbayan sa Sugbo.
Kini tungod kay, kon wa ko masayop, sila maoy unang local government unit (LGU) sa Sugbo nga nipagarpar nga magbuhat og Skate Park sa dihang ang Sugboanon nga si Margielyn Didal nisikat sa mga international competitions bisan og wala kini suporta sa lokal nga kagamhanan.
Panahon pa kini ni kanhi Cebu City mayor Tomas Osmeña niadtong tuig 2018, kinsa nisaad nga kon modaog ang Cebu City sa Philippine National Games, tunga sa premyo niini igahin ngadto sa pagpabuhat og sports and skating park sa South Road Properties.
Si Didal kinsa lumad nga taga Lahug, gawas sa iyang mga mga international achievements sa Estados, nakalabni usab og gold medal sa Asian Games.
Daghan ang nagtuo nga mahinayon na gyud ang pagtukod og skate park sa Cebu City nga ibutang diha sa SRP sa dihang gianunsyo na usab ni Osmeña nga ang iyang igsuon nga si Minnie nidonar og P5 milyunes alang ning maong proyekto.
Apan ambot og unsay nahitabo nga mora man og natunaw ang hisgut-hisgut hangtod nga nipuli ang bag-ong administrasyon.
Sama sa nangaging pamunoan, nibalik na usab ang isyo nga magtukod og skate park. Dunay mga balita nga nanggawas nga aduna nay gahin o budget para niini ug anaa na usab ang luna.
Gikan sa administrasyon ni anhing mayor Edgar Labella hangtod ni Mayor Mike Rama nagpadayon ang pagtuki kalabot niini. Pero wa tay nakitang aksiyon.
Ug kaluoy sa Diyos, bisan og usa lang ka lansang nga giugbok aron maghatag og timaan nga masugdan na ang pag-construct niini (ground breaking) wa gyud ta kabantay kon naa ba.
Gilimot-limotan lang sa mga pulitiko nga igo lang misakay sa popularity ni Didal.
Lahi ang dagan sa Dakbayan sa Talisay, kay wa gyuy kisaw ang ilang paghimo og world class nga skate park.
Way daghang langas, ug diha ra nabaniug sa kadaghanan sa dihang nag-inagural na niadtong Biyernes.
Hasta kita diri wa ta makahibawo nga dugaydugay na diay kining gisugdan. Gawas sa skate park, aduna usab kini area alang sa mga pamilya nga gusto’ng mag picnic ug duna usay playground.
Di unya nato ikasurprisa nga modagsa na unya ang mga turista (local ug international) diha sa Talisay tungod niining world class nga skate park.
Ambot og di ba kaha ni dakong tamparos sa Cebu City nga mosihag man nga wa silay nahimo isip suporta ngadto sa ilang atleta nga naghatag og dungog sa ilang kaugalingong dakbayan.
Kutob ra man sila sa saad ug pasalig.
Duna pa ba kahay hunahuna ang dakbayan nga ipadayon gyud ang skate park?
Dili kaha moingon na lang sila nga ang ilang skate boarders adto na lang papraktison sa Talisay kay duol ra? Posibli sab ni.
○ ○ ○
Ako diay’ng pahasubo ngadto sa banay ni Ma’am Tere, usa sa event organizer sa Sugbo nga nasuod nato.
Siya diay kadtong giingon nga niambak gikan sa 15th floor sa condo sa Lapu-lapu City.
Nakugang ko sa dihang nakadawat ko’g message gikan ni Dale Rosal sa CDN Digital niadtong Biyernes sa hapon.
Nasuod nako si Mam Tere kay sa matag higayon nga anaa siya’y event, di man gyud ta niya sipyaton pag-imbitar.
Wa ko magdahom nga duna diay siya’y problema kay jolly man kaayo siyang ikaatubang.
Katapusan namong himamat mao kadtong nagkaabot mi nila ni Cebu City Councilors Rey Gealon ug ni Dondon Hontiveros sa Waterfront Hotel.
Only last month, nakadawat sab ko’g imbitasyon gikan niya, pero wa ko magdahom nga katapusan na diay kadtong pag-imbitar niya diri kanato.
Adiyos kanimo, Ma’am Tere.