Migallen: Subidahon nga dalan sa Minnesota

Taym pa
SunStar Migallen
SunStar Migallen

Opps... Sa wala damha sa kadaghanan, ang Dallas Maverics mao na karon ang nag-una, 2-0, batok sa Minnesota Timberwolves sa ilang best-of-seven Western Conference finals.

Kini human gitusak ni Luka Doncic ang tres sa katapusang tres segundos sa regulation period aron itali ang 109-108 nga kadaugan sa Game 2 kagahapon.

Nahitabo ang bayanihong itsa ni Doncic atubangan pa gyud sa depensa sa higanting si Rudy Gobert kinsa maayong pagkalipat sa iyang step back three-pointer.

Ang Timberwolves nakaposte og 18 puntos nga labaw sa wala pa molusad og dakong rally ang Mavericks sa second half.

Sa kinatibuk-an, si Doncic, sa makausa pa, mipuga na sab og triple-double nga performance human kini motali og 32 puntos, 13 ka assists ug 10 ka rebounds.

Maayong naka backup kaniya si Kyrie Irving nga may 20 puntos, upat niini sa three-point land. Motapon ang series ngadto sa luna sa Dallas karong Lunes (oras sa Pilipinas). Ila pang korte, labaw pa sila sa series, 2-0.

Pero di gihapon angay mo­lugak ang Dallas ning bahina kay sa series karon ilabi na sa finals, dili morespeto og homecourt advantage ang team ilabi na kining Minnesota.

Nahinumdom mo sa nahitabo sa defending champion Denver Nuggets sa semis nga gisagonsonan og kaduha gilayon sa Wolves sa Games 1 ug 2 diha mismo sa ilang korte.

Mibawos man tuod ang Denver, pero sa Game 7 diha pa gyud nila pildiha ang Nuggets sa korte niini.

Dili man tuod halayo ang posibilidad nga mosubay usab kini sa susamang pattern, pero sa composure nga gipakita karon ni Doncic ug sa kinatibuk-ang puwersa sa Dallas, sa akong hamubo nga pangagpas labing taas sa Minnesota ang Game 6.

Dunay lapses sa depensa sa Wolves sa katapusang 12 segundos. Dili gyud unta si Gobert maoy angay modepensa ni Doncic kay may pagka bagal kini tungod sa iyang gidak-on.

Nagkinahanglan sila og abtik og lagsik aron makaapas sa pagdepensa ni Doncic.

Pero sa ato nga sitwasyon human maigo sa screen si Jaden McDaniels, si Gobert napugos sa pagsaka sa iyang depensa hinungdan nga gipahimuslan gilayon kini ni Doncic.

Gilipat sa iyang kahanas sa pagdribol ug kalantip sa footwork, si Doncic daling nakakita og higayon dayon lusad sa iyang step-back three-pointer ug didto naimpas ang utang.

Malisod nga tahas ang sagubangon sa Wolves sa Game 3 kay kini maoy mag-aninaw sa ilang chance ning maong series.

Kinahanglan ilang likayan sa Minnesota ang 0-3 nga haw-ang, kay kon dili kasaysayan ra ba sa NBA wala pay team nga nakabangon sa ingon ani nga sitwasyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph