Kulba dalang kahinam maoy masaksihan karong Sabado sa dihang ipahigayon na ang Fist of Fury 8: Philippines versus Japan diha sa SkyHall sa SM Seaside City sa Mambaling.
Mga boxing prospects sa Japan ang moataki dinhi sa Sugbo aron mosuway sa katakos sa mga Cebu-based fighters.
Sa main event, ang wala pay pildi nga si Junibert Bantay sa Chao Sy Boxing Stable mosuway sa katakos ni Haruki Miyamoto alang sa WBF Asia Pacific Youth Championship.
Kining duha pulos undefeated sa ilang professional fights.
Laing gituohan nga mokawat og atensiyon sa maong adlaw kining sinukliay sa kumo tali ni Jemuel Aranas sa Carcar City ug ni Kiyoto Narukani sa Osaka, Japan alang sa Philippine Boxing Federation title.
Si Narukani ani-a na magbasehan sa PIlipinas ubos sa Zip Sanman Boxing Team. Gawas sa atong nahisgutan, aduna pay laing tulo ka binukbokay sa mga professional fighters ug laing lima ka paresan sa amatuer fights tali sa Pilipinas ug Japan boxers.
Kining maong card maoy magsilbing pasiuna nga bigtime boxing event ubos sa Lorenzo "Chao" Sy International Boxing Promotions nga mosentro dinhi sa Sugbo ug silingang dapit.
Si Sy mibutyag nga duna pay siyay mga dagkong event nga iya karong gihan-ay sulod ning tuiga - butang nga angay natong suportahan. Goodluck, Guys!!!
○ ○ ○
Big-time boxing is slowly shaking up again in the Philippines.
Wala pa man tuod mahingpit ang mga plano, apan hataas ang posibilidad nga mahatagan kini og katumanan.
Ang buot nakong ipasabot mao kining gidibuho karon nga kabahin sa golden anniversary celebration sa Thrilla in Manila nga gikatakda sa bulan sa Oktobre.
Ubos sa MP Promotions ni Manny Pacquiao, mga inila ug nag-unang Filipino fighters ang mopakita og aksiyon sa maong presentasyon nga anha ipahigayon sa Araneta Coliseum.
Lakip sa gipunting karon nga moaway sa nahisgutang promotion mao sila si kanhi world boxing champion Mark Magsayo, reigning world champion Melvin Jerusalem, two-time Olympian Eumir Marcial, undefeated bantamweight prospect nga si Carl James Martin. Posibli usab nga maapil si kanhi IBF super-flyweight champion Jerwin Ancajas.
Dili pa matino kon moaway ba usab ang kasamtangang world champion nga si Pedro Taduran. . Sa samang higayon, magsilbi usab kining launching sa professional boxing career ni Jimuel Pacquiao, ang kamaguwangang anak sa eight-time world boxing champion Manny Pacquiao.
Bisan tuod og wala pa mabutyag ang kontra, apan gilaraw nga si Magsayo paawayon alang sa title eliminator match samtang si Jerusalem padepensaon sa iyang WBC minimumweight title.
Kon kahinumdoman, ang Araneta Coliseum niadtong Oktubre 1, 1975, maoy nahimong espesyal nga dapit sa world boxing diin gipahigayon ang away ni Muhammad Ali ug Joe Frazier sa usa ka kulbahinam nga panagsangka nga nakakulit og kasaysayan sa nasod.
Sa maong away, gi-knockout ni Ali si Frazier sa ika-14 nga round. Pero sa dili pa mahitabo kining atong gihisgutan sa unahan maong promotion, angay lang usab nga dili nato palabyon kining laing IBF title eliminator tali ni Regie Suganob sa PMI-Bohol Boxing Stable ug Jayson Vayson.
Kini gikatakda karong Septiyembre 20 sa Tagbilaran City, Bohol. Makapaikag kining awaya tungod kay si Suganob adunay impresibong 16-1, 6KOs nga baraha, samtang si Vayson naghambin usab og 14-1-1, 8KOs nga karda. Ang duha pulos 27-anyos ang pangidaron.
Kini gud si Suganob, lumad nga taga Dauis, Tagbilaran City daw og sa gilihayan sa mga world champions sa iyang division. Mao nga kini maoy laing paagi o oportunidad nga siya mamahimong mandatory challenger kon modaog - ug dili na unya makalikay kaniya ang world champion.
Keep up the world, Regie...