Migallen: Suporta sa Cebu Greats

Kaduha man tuod sagunsuni og duha ka sakit nga kapildihan, apan at least, ang bag-ong hinashasan nga Cebu Greats nakapakita na og saktong labok sa nagpadayon nga Maharlika Pilipinas Basketball League (MPBL).

Buot pasabot, ang labok nga nagpakita og kasingkasing sa usa ka Sugbuanong Warriors nga tinud-anay nga nagrepresenta sa Sugbo ning maong kompetisyon.

Sa 4-14 nga baraha ug nahimutang sa ika-13 nga luna sa South Division, lisod nang tuohan nga makasulod pa sila sa playoffs.

Pero tungod sa ilang lig-ong determinasyon wala usab nila isalikway kining maong posibilidad.

Ang pagharos sa nahabilin nilang 12 ka mga duwa maoy ilang gilauman nga makapausab sa dagan sa team, nga sa samang higayon makapawanang sa dalan alang sa sunod round.

Pero ang dakong punto nga nasabwag sa Cebu Greats mao ang dakong kausaban nga naghatag og positibong mensahe sa mga Sugbuanon.

Unsa kaha kon ang Cebu Greats nahulma og sayo unya gilangkuban og pulos Sugbuanon lakip na sa higanting si Greg Slaughter.

We can just imagine, JR Quinahan at his 40s, mitali og 31 puntos, butang nga nakasurprisa sa kadaghanan, lakip na ni MPBL commissioner Kenneth Duremdez.

Mac Tallo, ang giatngan sa kadaghanan, sa iyang unang adlaw sa team nalimitahan lang og sa kuwatro puntos, pero ang iyang lima ka steals ug 10 ka assists naghatag og positibong timaan sa umaabot pa nilang mga duwa.

Si Paul Desiderio matataw nga wala pa kaayo mabaliki sa iyang kaniadto was good for four points pero ang iyang presensiya sa korte makatampo og hulga sa opensa.

Jun Manzo, produkto sa University of the Visayas (UV), ang laing mahait nga materiyal nga kasandigan sa team. Iyang napakita ang saktong liderato sulod sa korte sa una nilang duwa batok sa Pampanga diin mipupo siya og 20 puntos.

Sa second game batok sa Biñan, maayo unta kaayo siyang nakasugod apan tungod sa kuwestiyonable ug makapaduda nga tawag sa referee na-eject kini sa first quarter human makapuga og siete puntos.

Ug labaw sa tanan, ubos sa paggiya ni coach Junthy Valenzuela kinsa nakapakita na sa iyang kahaniti nga modala sa team, “there's no other way for the Cebu Greats, but up.”

Anaa usab si Dondon Hontiveros nga miitsa sa iyang suporta isip assistant coach.

Atong panghinauton nga daghan pa unyang dekalidad nga mga Sugbuanon ang motapon sa Cebu Greats aron pagsalbar ug pagpabalik sa nahugmak nga dungog sa Sugbo sa natad sa basketball.

A big thanks to Sir Sam Lato and Sir Jhon Santos for saving Cebu's reputation in the field of basketball. May the Cebu leaders extend their support, too.