Gawas nga mius-os ang produksiyon sa uma sa kabukiran sa dakbayan sa Sugbo, napugos sab ang ubang mag-uuma sa paghunong sa pagpananom gumikan sa nagpadayon nga paghubas sa ilang tinubdan sa tubig resulta sa El Niño.
Mao kini ang kahimtang karon sa mga umahan nga nahimutang sa mga bukirang barangay sa dakbayan sa Sugbo, butyag sa pipila ka mga opisyal sa barangay ug mga lider sa asosasyon sa mga mag-uuma.
Bag-ohay lang gipaubos sa Cebu City Council ang 28 ka mga barangay sa dakbayan sa state of calamity tungod sa nagpadayong grabeng kahimtang sa panahon. Gideklarar sa Konseho ang state of calamity atol sa ilang session niadtong Miyerkules, Marso 27, 2024.
Ang mga barangay nga gilakip niini mao ang Budlaan, Binaliw, Paril, Taptap, Pulangbato, Mabini, Malubog, Agsungot, Guba, Lusaran, Adlaon, Cambinocot, Pamutan, Sirao, Sapangdaku, Toong, Buhisan, Pung-ol Sibugay, Babag, Sudlon 1, Sudlon 2 , Bonbon, Sinsin, Kalunasan, Buot, Tagbao, Busay ug Tabunan, sumala ni City Agriculturist Joelito Baclayon sa unang pakighinabi sa SunStar Cebu.
Ang presidente sa Alliance of Cebu City Farmers Association nga si Casimero Pilones niingon nga pipila ka mga sakop sa ilang grupo nakahukom sa paghunong sa pagtikad sa ilang mga umahan tungod sa kakuwang sa tubig.
“Gamay nalang ang farmers nga naa karoy tanom kay wala nay ikabubo,” matod ni Pilones sa text message sa SunStar Cebu sa Dominggo, Marso 31, 2024.
Ang Sugbo ubos sa dry spell nga nagsugod niadtong Pebrero, ang Philippine Atmospheric, Geophysical and Astronomical Services Administration (Pagasa) nipahibalo sa samang buwan.
Paglabay sa usa ka buwan, nipahibawo ang Pagasa nga ang dry spell nga nasinati sa Sugbo nibalhin na sa huwaw.
Si Malubog Barangay Kapitan Dennis Dabuco niingon nga ang mga mag-uuma sa iyang barangay nipili sa pagtipig sa nahabilin nilang mga liso ug nipili sa paghuwat sa ting-ulan.
Ang Malubog usa sa mga barangay nga gipaubos sa state of calamity tungod sa El Niño.
Matod ni Dabuco nga ang kakuwang sa tubig maoy dakong gikabalak-an sa mga mag-uuma.
Si Cambinocot Barangay Captain Reynaldo Lauron, sa usa ka pakighinabi, niingon nga daghang mga mag-uuma sa iyang barangay ang kasamtangan nga nihunong sa pagpanguma tungod kay nawad-an sila og kita. / JJL