Ulitawo nga giingong niilis og asin sa gipapalit nga shabu gipusil patay alas 11:10 sa gabii sa Lunes, Nobiyembre 27, 2023 sa Sityo Hoyong-hoyong, Alaska, Barangay Mambaling, Cebu City.
Si Angelbert Atilano, 24, drug surrenderer, nagpuyo sa lugar, namatay human nakaangkon og mga samad pinusilan sa luyo nga bahin sa ulo ug lawas.
Ang biktima nagduwa og online games sud sa usa ka internet cafe sa dihang ning-abot ang mga killer nga nagsakay og motorsiklo.
Sigun sa mga saksi nga ang angkas nikanaug ug way pagduha-duha, nipusil sa biktima.
Nasubay sa kapulisan nga nakatambling og usa ka bulto nga shabu ang biktima.
Nasayran sab nga sa miaging semana, giingong adunay nasuko ni Atilano kay gisugo kini og 1/4 nga gramo nga shabu apan giilisan niini og asin.
Nagduda ang kapulisan nga “gi-hunting” sa killer ang biktima tungod sa iyang gihimo.
Gawas niini, gikataho’ng dako sab kini og nadispalko sa drugas.
Adunay closed circuit television (CCTV) footage sa lugar diin nakita nga miagi ang motorsiklo apan wala nakuha ang pagpusil kang Atilano.