NABALHOG sa prisuhan ang usa ka 24-anyos nga construction worker nga giingon’g naigo sa ilimnong makahubog human siya nisulod sa kuwarto sa iyang naibgan nga dalaga sa usa ka subdivision nga nahimutang sa Barangay Guadalupe, Siyudad sa Sugbo niadtong Sabado sa kadlawon, Hunyo 28, 2025.
Giila ang suspek sa alyas nga Daryl, dunay live-in partner, ug residente sa Barangay Tabok, Siyudad sa Mandaue.
Samtang ang biktima nailhan sa alyas nga Lory, 22 anyos, dalaga, usa ka katabang sa usa ka panimalay sulod sa maong subdivision.
Sa inisyal nga imbestigasyon sa kapulisan sa Guadalupe, nasayran samtang natulog ang biktima giingon’g kalit lang nisulod ang suspek sa maid’s quarter nga nahimutang sa gawas sa balay sa iyang amo.
Nakugang na lang si Lory nga dunay nagsige og lihok sa iyang kilid nga matod pa nagduwa sa iyang kinatawo.
Tungod sa kahadlok sa biktima, nisyagit siya ug nidagan padulong sa guard house para mangayo og tabang.
Samtang sa habig sa suspek, niangkon siya nga nisulod siya sa maong kwarto tungod kay matod pa nadala ra siya sa iyang kahubog niadtong higayona.
Apan nihimakak siya sa pasangil batok kaniya sanglit wala siya makahikap sa biktima kay dihang nakasulod siya sa lawak niini nakamata dayon kini.
Nidugang sab si Daryl nga dugay na siyang naibog sa maong biktima apan wala siyay igong kusog para manguyab niini sanglit tagsa ra kaayo ni mogawas sa balay.
Daling nasikop ang suspek sa mga kapulisan tungod kay tapad ra ang gitrabahoan niini nga construction site ug gidala sa Guadalupe Police Station.
Kasong trespassing ug unjust vexation ang atubangon sa maong suspek. / JDG