Giila nga notadong kawatan sa sulod sa usa ka mall ang nadakpan human mabantayi nga wala moagi sa counter samtang nagbitbit sa duha ka karsones alas 5:30 sa hapon, Dominggo, Marso 16, 2025, sa Ayala Central Bloc, Barangay Apas, Dakbayan sa Sugbo.
Ang nabalhog sa Mabolo Police Station giila nga si alyas Jeremie, 34, lumad nga taga Daanbantayan, Sugbo apan kasamtangan nga nagpuyo sa Barangay Tisa, Dakbayan sa Sugbo.
Nakuha gikan sa suspek ang duha ka RRJ brand nga pantalon nga mokantidad ang tanan sa P2,598.
Giangkon sa suspek ang krimen gani makadaghan na siya madakpi sa kapulisan apan makagawas ra usab sa iyang kaso.
Kaniadto ang iyang paborito nga kawaton nga karsones lahi nga brand apan tungod kay binantayan na siya pag-ayo, nibalhin siya sa RRJ.
Ang makuha nga pantalon iya matod pa nga ibaligya sa barato nga presyo ug mobalik na usab sa pagpangawat. /AYB