Mikuha og police clearance, gisikop

Mikuha og police clearance, gisikop
SunStar Local News GPX

Usa ka tricycle driver nga wanted sa kaso’ng carnapping nasikop sa Carcar City Police Station sa Brgy. Poblacion 3, Carcar, alas 7:34 sa gabii sa Martes, Pebrero 6, 2024, human nikuha og police clearance.

Si Orlando Rulida Gardiola, 53, minyo, taga Sitio Lower Cambuntan, Brgy. Bolinawan, Carcar, nasuta nga wanted pinaagi sa data sa computer sa kapulisan.

Ang police stations sa nasod konektado na karon sa sistema sa computer sa ilang data labina sa mga kaso ug wanted nga tawo.

Si Police Lt. Col. Bryan O’ Niel Salvacion, hepe sa Carcar Police Station nga nahinabi sa Superbalita Cebu, nagkanayon nga si Gardiola nikuha og PNP clearance isip kabahin sa requirements sa pag-renew sa permit isip drayber sa tricycle.

Nakita sa application sa data sa National Police Clearance nga siya wanted sa kasong carnapping ug dunay arrest warrant nga giisyo ni Judge Fernando R. Fudalan Jr. sa Regional Trial Court (RTC) Branch 34 sa Cabadbaran City, Agusan Del Norte nga gipitsahan og Hunyo 17, 2020.

Ang korte nihatag og pagtugot sa dinakpan nga makapiyansa og P300,000.

Ang akusado nibutyag sa kapulisan nga wala niya giuli ang gimanihong traysikol sa Mindanao kaniadto ug iyang gibaligya dayong larga sa Sugbo.

Mao kini hinungdan nga gipasakaan siya og kasong carnapping.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph