PATAY diha-diha ang usa ka 28 anyos nga call center agent nga lalaki human matud pa milayat sa ika-18 nga andana sa usa ka condominium nga nahimutang sa Barangay Banilad sa Siyudad sa Mandaue sa alas 5:30 sa buntag, Dominggo, Hunyo 22, 2025.
Ang biktima giila sa alyas nga Aljer, nagpuyo ra usab sa maong condominium.
Nadawat sa Mandaue City Police Office ang tawag sa telepono alas 6:50 na sa buntag nga nagpahibawo nga dunay tawo nga natagak sa ika-18 nga andana sa building.
Sa gihimong imbestigasyon, nasuta nga niambak matod pa kini human giingong gibuwagan sa iyang uyab.
Apan ang kapulisan sa siyudad sa Mandaue mopalawom sa ilang imbestigasyon aron sutaon kun wala bay foul-play sa maong hitabo.
Makig-alayon sila sa kabanay ug higala sa biktima kun duna bay nasultihan niini nga problema ngano’ng misangpot sa maong insidente.
Lakip sa ilang ipasubay ang mga CCTV camera sa maong condominium aron masuta kung wala bay laing tawo nga kauban ang biktima sa ika 18 nga andana.
Sa kadtong nag-antos og depression ang Philippine Mental Health Association, Inc. Cebu Chapter nagtanyag og online psychiatric ug psychological services. Mamahimong matawgan ang mga mental health professionals sa mobile number nga 0917-655-0023; pmhacebu1950@gmail.com, Lunes ngadto sa Biyernes, 8AM-5PM. Mamahimo sab nga tawgan ang Tawag Paglaum Centro Bisaya, 24/7 call-based hotline alang sa suicide prevention ug emotional crisis sa numero 0939-937-5433; 0939-936-5433 ug 0927-654-1629. / AYB