Tulo ang nangamatay sa managlahi’ng mga aksidente sa kadalanan, duha niini naglambigit og mga motorsiklo nga naigo sa laing mga sakyanan.
Sa usa ka talagsaong hitabo, namatay ang usa ka security guard sa iyang paglihay sa usa ka sakyanan kay naigo siya sa laing sakyanan.
Patay nang nalandig sa tambalanan ang security guard nga giila nga si Ruel Dela Rama, hingkod, taga Cebu City, human madasmagi og wing van alas 4 sa kaadlawon sa Biyernes, Disyembre 29, 2023 sa Dan AC Cortes, Brgy Opao, Siyudad sa Mandaue.
Ang drayber sa van nga nakaigo kaniya giila nga si Junard Nacua, 31 , ulitawo, taga Pajac,Siyudad sa Lapu-Lapu.
Sa interview kang Police Capt. Arnil Caloscos, officer-in-charge sa Mandaue Traffic Office, si dela Rama nagpaatras sa usa ka trailler truck sa may Monarch.
Matod ni Caloscos nga dunay nag-park nga multicab sa maong dapit nga nadasmagan sa wing van nga gikan sa Siyudad sa Lapu-Lapu.
Si dela Rama nilihay sa muliticab nga nagpadung kaniya sa dihang nalagpot, apan apan ang wing van nga nilihay usab sa multicab niigo na hinuon sa security guard.
Ang biktima gidali sa pagdala sa ospital apan patay nang niabot samtang si Nacua napriso ug hayan pasakaan og kasong reckless imprudence resulting in homicide.
MOTORSIKLO
Wa na ma dala pa sa tambalanan kay namatay diha-diha ang usa ka nagmotorsiklo human nadasmagan ug naligsan sa dakong mixer truck alas 9:40 sa gabii sa Huwebes, Disyembre 28, 2023 sa dan S. Osmeña, Brgy. Tejero, Siyudad sa Sugbo.
Ang biktima giila nga si Christopher Moral, 43, taga Brgy. Paknaan, Siyudad samtang ang ang drayber sa mixer truck mao si Sergio Villaflor, 34, taga Brgy. Balao, Barili, kasadpang habagatang Sugbo
Base sa pasiunang nakuhang kasayuran sa Superbalita Cebu gikan sa kasaligang tinubdan, si Moral nagmotorsiklo padulong mopauli sa Pacnaan.
Pag-abot sa mao nga dapit, siya nadasmagan ug pagkatumba naligsan ang iyang ulo trak. Siya namatay diha-diha.
Ang tibuok hitabo nakuha sa closed circuit television (CCTV) camera.
Si Villaflor nga napriso sa Waterfront Police Station, nagkanayon nga igo ra siya’ng nakamatikod nga may nipaka sa likod sa iyang gimaniho nga mixer truck.
Samtang namatay ang usa ka 18 anyos nga batan-ong lalaki nga nagmotorsiklo human madasmagi sa usa ka Mitsubishi Strada pick up alas 7 sa gabii sa Disyembre 28, 2023 sa Purok Kawayan, Sityo Cadaatan, Brgy. Sumaguan, bukiran sa Argao.
Ang biktima giila nga si Jamreyan Ngujo, ulitawo taga Brgy. Langub, Argao, samtang ang drayber sa Mitsubishi Strada mao si Mark Lloyd Cabahug, 41, taga Brgy. Poblacion sa mao nga lungsod.
Sa imbestigasyon sa kapulisan sa lungsod sa Argao ubos sa kamanduan sa ilang hepe nga si Police Major Ivy Martin Bartolome,matod pa nga si Cabahug gikan sa Brgy. Langub padulong sa Talo-ot.
Samtang ang biktima gikan sa Talo-ot Argao padulong sa Langub mopauli.
Apan. pag-abot sa blind curve sa Purok Kawayan, ang drayber sa Strada ni-overtake sa laing motorsiklo nga iyang gisundan.
Matod pa nga wa nakamatikod si Cabahug kay way suga ang motorsiklo nga iyang gikasugat nga niresulta sa dinasmagay.
Ang biktima nga nakaangkon og grabing kadaut sa kalawasan gidali sa pagdala sa Bogo Argao District Hospital ICKMH apan nakabsan sa kibabuhi.
Samtang si Cabahug gibilanggo pa sa pagsuwat ning taho alang sa kaso nga ipasaka batok kaniya.