Nisugod na og lingkod sa ilang tagsa-tagsa ka katungdanan pagkaudto sa Hunyo 30, 2025, ang mga bag-ong opisyal sa Siyudad ug Kalungsoran sa Sugbo lakip sa tibuok nasod.
Sa Consolacion, ang reelected Mayor Teresa “Nene” Alegado ug Vice Mayor Johannes Alegado nagsugod sa ilang opisyal nga katungdanan ug trabaho pinaagi sa usa ka misa nga gihimo sa wala pa ang seremonyas sa pagpanumpa.
Ang mga opisyal sa lungsod giubanan ni Vice Governor Glenn Soco nga unang nangulo sa seremonyas sa pag-isa sa bandila sa Cebu Provincial Capitol grounds.
Sa Carcar City, si Mayor Patrick Barcenas nangulo sab pag-isa sa bandila, gisundan sa usa ka programa nga nag-ila sa mga kalampusan sa mga atleta ug estudyante sa dapit pinaagi sa mga pasidungog.
Sa Naga City, si Mayor Valdemar Chiong nipapanumpa ni City Councilor Clint Isidro Chiong nga napili isip number one councilor sa eleksiyon sa Mayo.
Sa Poro, si Vice Mayor Dina Rama nangulo sa gihimong awarding alang sa SUGBUsog sa Eskwelahan “Estudyanteng Busog, Luwas ug Himsog” Program Season 4 ug ang SUGBUsog (Sugboanong Busog, Luwas ug Himsog) Program Season 5 – Municipal Level.
Sa Argao, Moalboal, ug Oslob, gisugdan sa mga opisyales ang ilang bag-ong termino pinaagi sa usa ka seremonya sa panumpa nga gipangunahan sa ilang tagsa-tagsa ka mga mayor.
Giabi-abi sa munisipyo sa Borbon ang bag-ong napiling Mayor Nico Dotillos atol sa usa ka transisyon ug seremonyal nga turnover sa mga responsibilidad.
Giubanan siya sa ubang mga napiling opisyales sa lungsod.
Sa Medellin, usa ka malinawon nga pagtunol sa gahom ang gipangulohan sa outgoing Municipal Mayor Joven Mondigo, Jr., nga nakiglamano nakikamot sa bag-ong Municipal Mayor Edwin Salimbangon dihang pormal niya nga gitunol ang mga responsibilidad sa Municipal Function Hall.
Gihulagway sa Lungsod sa Sibonga nga hapsay ang transisyon, ug ang outgoing Mayor ug incoming Vice Mayor Mariano Laude nitunol sa yawe sa responsibilidad ngadto sa incoming Municipal Mayor Caroline S. Bacalto sa New Municipal Executive Building.
Sa Ginatilan, ang paglingkod sa katungdanan sa bag-ong napili ug reelected nga mga local executive sa lungsod giunhan sa usa ka seremonyas sa pag-isa sa bandila nga gipangulohan sa reelected Mayor Roy Vincent Singco nga gitambongan sa mga opisyales ug empleyado sa Municipal Hall.
Sa Asturias, ang reelected Mayor Dongkoy Dumdum ug outgoing vice mayor Labuca nangulo sab sa seremonyas sa pag-isa sa bandila.
Si Labuca nagpasalamat ngadto sa katawhan sa Asturias atol sa iyang pagpanamilit sa katungdanan nga iyang gihuptan sulod sa daghang katuigan. / Frances Ibo, VSU Intern