Nagkanayon ang Presidente sa Amerika nga si Donald Trump kagahapon, Miyerkules, Abril 1, 2026 (PH time), nga mobiya na ang mga militar sa Amerika sa Iran sa umaabot duha o tulo ka mga semana.
“We leave because there’s no reason for us to do this,” matod ni Trump sa mga tigbalita sulod sa White House.
Dihang gipangutana kon unsa’y iyang plano aron mokanaog og balik ang presyo sa gasolina ug krudo, si Trump nitubag og, “All I have to do is leave Iran, and we’ll be doing that very soon, and they’ll become tumbling down.”
Si Trump kinsa nag-atubang sa grabe nga pressure gikan kaguliyang sa merkado sa enerhiya ug sa kabalaka sa mga magpapatigayon tungod sa nagdugay nga panagbangi, nagpagawas na og daghang nagsumpaki nga mga pamahayag bahin sa timeline sa gubat sukad nga ang Amerika ug Israel naglusad og dagkong mga pag-ataki sa Iran niadtong Pebrero 28.
Matod ni Trump nga ang Amerika ug Iran kasamtangang nagnegosasyon ug posible nga mahuman ang gubat sa mas daling panahon kon ang duha ka mga nasod makakab-ot og kasabutan.
“It’s possible that we’ll have a deal because they want to make a deal. They want to make a deal more than I want to make a deal. But in a fairly short period of time, we’ll be finished,” asoy ni Trump.
“Now we have a group of people that’s very -- that are very different. They’re much more reasonable,” dugang niya.
Gisubli ni Trump nga nagdepende na sa ubang mga nasod ang pag-abli og balik sa Strait of Hormuz ug ang paghatag og seguridad sa mahinungdanong agianan sa enerhiya sa tibuok kalibotan.
“If France or some other country wants to get oil or gas, you go up through the strait and -- the Hormuz Strait -- they’ll go right up there and they’ll be able to fend for themselves,” matod ni Trump. / Xinhua