‘Milugos’ sa bata, dakpan

SUSPEK SA LUGOS: Kini ang suspek sa giingon nga paglugos sa 13 anyos nga bata sa Brgy. Pandan, siyudad sa Bogo, ala 1:00 sa hapon sa Dominggo, Enero 14, 2024.
SUSPEK SA LUGOS: Kini ang suspek sa giingon nga paglugos sa 13 anyos nga bata sa Brgy. Pandan, siyudad sa Bogo, ala 1:00 sa hapon sa Dominggo, Enero 14, 2024. Gikan sa Bogo City Police Station

Nag-brief na lang nga nidagan padung sa kalibunan ang usa ka 56 anyos nga lalaki nga biyudo dihang nasakpan nga ‘nilugos’ sa iyang silingan nga 13 anyos nga babaye sa Brgy. Pandan, siyudad sa Bogo, ala 1:00 sa hapon, Dominggo, Enero 14, 2024.

Apan ang ngan sa suspek nga silingan sa biktima wa una gibutyag sa kapulisan sa pagtago usab sa pagkatawo sa menor de edad.

Sa imbestigasyon sa Wo­men and Children Protection Desk sa (WCPD) sa Bogo City Police Station ubos sa kamandoan sa ilang hepe nga si Police Lt. Col. Joan Arnoco, nasayran nga ang biktima nga 13 anyos nga babaye nitubag sa sugo sa lawas sa kalibunan.

Pagkahuman niini, nangita siya sa iyang manghod apan sa kalit lang, nitumaw ang suspek ug gidala siya og balik sa kalibunan.

Matod sa bata, gihaylo siya nga maoy mogasto sa iyang pag-eskwela ug didto na gibuhat ang lawasnong tinguha sa suspek.

Apan nabulabog sa dihang dunay lain nilang silingang babaye nga nanguha og sa­nga sa kahoy ug didto iyang na­kit-an ang suspek ug biktima.

Gisinggitan niini ang biktima sa pagdagan ug ang suspek nidagan usab nga nag-brief na lang padulong sa mas suok nga bahin sa kalibunan.

Samtang, ang bata gikuyogan sa iyang silingan nga nakasaksi sa hitabo ngadto sa iyang ginikanan ug nitug-an sa nahitabo.

Ang mga ginikanan ningsumbong sa kapulisan hinungdan nga nadakpan sa hot pursuit sa kapulisan ang suspek sa ilang dapit nga nakig-inom na sa iyang mga barkada.

Samtang, ang WCPD sa Bogo City Police Station mohimo pa og dugang imbestigasyon kon ang bata malampuson ba’ng nalugos sa suspek pinaagi sa medical examination.

Sa pagkakaron, ang suspek gitanggong na sa kapulisan sa Bogo ug gikatakda nga pasakaan og kaso nga pag-abuso sa usa ka menor de edad.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph