SURPRESANG gibisita ni Gobernador Pamela Baricuatro ang Minglanilla District Hospital niadtong Miyerkules, Hulyo 3, 2025.
Nakita niya ang naguba nga mga tiles, kakuwang sa medikal nga gamit ug tambal, ug kulang sa staff.
Gisusi sa Gobernador ug sa Provincial Health Consultant nga si Dr. Elisse Nicole Catalan ang mga departamento.
Lakip sa mga nakita nga problema ang guba nga tiles sa kusina bisan bag-o pa ang building, kakuwang sa bakuna sa rabies ug dental chair, ug kakuwang sa tambal ug aircon sa botika.
Aduna lay tulo ka nebulizer machine ang ospital.
Gibutyag ni Baricuatro ang panginahanglan sa pagpaayo sa labor, delivery, ug operating rooms aron makatabang sa pagsulbad sa kahuot sa Vicente Sotto Medical Center.
Nakita sab ang panginahanglan nga dugangan ang staff sa ospital. / CDF