Usa ka kustomer sa Jollibee fast food sa Brgy. West Poblacion, lungsod sa Moaboal ang angol human nidasmag sa bildo nga bungbong ug nilahos ngadto sa sud ang mini SUV Suzuki Jimny, alas 9:20 sa buntag, Abril 11, 2024.
Ang biktima giila nga si Niño Besa, 33, ulitawo, taga Brgy. Basdiot, Moalboal.
Ang drayber sa Suzuki Jimny giilang si Anataliio Labra Cardente Jr., 64, ulitawo, taga San Roque Village, Brgy. Calamba, Siyudad sa Sugbo.
Nasayran sa Superbalita Cebu sa pamahayag ni P/Capt. Claudio P Gako, hepe sa kapulisan sa Moalboal nga si Cardente nagmaniho sa mini SUV nga automatic ug buot unta nga mo-park sa maong dapit apan nakaigo sa likod nga bahin sa usa ka bus sa Metro Link nga gimaniho ni Archie Manggay Rodriguez nga taga Santa Felomina, lungsod sa Alegria nga nipakanaug og pasahero sa bus stop duol sa maong fast food chain.
Sa dihang nibawi si Cardente sa manubela sa mini SUV, wa na siya makakontrolar sa dagan hinungdan nga nalahos sa sud sa Jollibee. Ang kustomer nga nagkaon naigo sa tuong kamot, gidala sa mga responder sa Moalboal ngadto sa Badian District Hospital.
Atol ning pagsuwat, ang management sa Jollibee wa pa nakahatag og pilay danyos sa ilang establisemento.
Ang drayber sa mini SUV gikustodiya sa kapulisan samtang nagpaabot sa reklamo sa management saJollibee ug pagpasaka og kasong reckless imprudence resulting to physical injury ang damage to property. /