Gipadayag ni Senador Risa Hontiveros sa Lunes, Hunyo 9, 2025, nga ang minoriya nga grupo sa Senado nga naglakip kaniya ug kang Senate Minority Leader Aquilino “Koko” Pimentel III, pormal nga molihok alang sa pagsugod sa mga seremonya sa impeachment trial ni Bise Presidente Sara Duterte.
Sa usa ka press conference, si Hontiveros niingon nga atol sa plenary session, molihok sila aron tugotan si Senate President Francis Escudero nga manumpa isip presiding officer sa impeachment court ug sa pagdumala sa gikinahanglan nga panumpa sa tanang mga miyembro sa Senado nga magsilbe nga mga maghuhukom sa husay, subay sa Konstitusyon.
Matod ni Hontiveros nga molihok sab sila aron ang Senado magtagbo isip impeachment court, ingon man alang sa presentasyon sa Articles of Impeachment nga nadawat gikan sa House of Representatives niadtong Pebrero.
Asoy niya nga kining mga proseso dili molungtad og sobra sa usa ka oras.
Ang impeachment ni Duterte nagtuyok sa unom ka dagkong mga alegasyon, ang matag usa nalambigit sa giingong mga paglapas sa 1987 Konstitusyon, sa Anti-Graft and Corrupt Practices Act, ug uban pang mga balaod.
Naglakip kini sa pasangil nga nakigkunsabo si Duterte aron patyon si Presidente Ferdinand “Bongbong” Marcos Jr. ug sa iyang asawa, sayop nga paggamit sa 612.5 million confidential funds gikan sa Office of the Vice President ug Department of Education (DepEd), bribery ug corruption sulod sa DepEd diin si Duterte maoy secretary niadtong 2022 hangtod 2024.
Gikutlo sab sa mga reklamo ang wala masaysay nga bahandi ni Duterte ug pagkapakyas sa pagbutyag sa mga kabtangan; ang iyang giingong pagkalambigit sa extrajudicial killings, ilabina sa iyang panahon isip Mayor sa Davao City; ug ang iyang pagkalambigit sa mga buhat sa destabilisasyon, pagrebelde, ug kagubot sa publiko.
Ang pagbasa sa mga reklamo sa impeachment batok kang Duterte giuswag gikan sa Hunyo 2 ngadto na sa Hunyo 11.
Matod ni Escudero nga ang paglangan nahitabo tungod sa panginahanglan nga unahon ang pagpasar sa mga butang sa legislative agenda sa administrasyon sa dili pa ang ika-19 nga Kongreso mo-adjourn sine die sa Hunyo 14.
Sa sayo pa, si Senador Ronald dela Rosa niangkon nga naghimo siya og resolusyon nga nagtinguha sa pagbasura sa impeachment case batok kang Duterte.
Sa Lunes sa buntag, matod ni Escudero nga wala pa’y na-file sa Senado ang resolusyon ni Dela Rosa.
Sa usa ka pahayag, ang defense team ni Duterte lig-ong nagbarog nga ang pagsugod sa proseso sa impeachment, hilabi na ang Fourth Impeachment Complaint, usa ka seryuso nga constitutional infirmities. / TPM / SunStar Philippines