“Triping lang to nako.”
Mao ni ang pamahayag sa 56 anyos nga lalaki nga pasakaan og kaso sa paglapas sa Republic Act 11313 kun Safe Spaces Act (Bawal Bastos Law) human siya gireklamo sa 32-anyos nga ginang sa pagbinastos sa Lunes sa buntag, Marso 25, 2024 sa gate sa Tejero Elementary School sa Brgy. Tejero, Cebu City.
Ang suspek nga natanggong sa Waterfront Police Station gipasanginlan nga niduwa sa iyang kinatawo ug ang likido nituasik ngadto sa likod sa inahan nga nihatod sa iyang anak.
Tungod niini, si Rusty gidakop sa gwardya sa tunghaan mga alas 6 sa buntag ug gitugyan sa Waterfront police.
Sa interbyo sa Superbalita Cebu, siya niangkon nga nablangko siya human niya nakita nga sexy ang biktima nga naka short pants lang.
“Wala na ko nakahibalo nga ako siyang ______. Ako nabantayan nga __________, blanko ko ato,” asoy ni Rusty ning mantalaan.
Apan gihimakak niya ang pasangil nga ikalima na ang ginang nga biktima niya kay ikaduha pa lang kadto.
Nangayo siya og pasaylo sa biktima apan wa dawata.
Si Ryan Monterroyo, guwardiya sa tunghaan nga nahinabi sa Superbalita Cebu, niingon nga iyang gidakop si Rusty human nireklamo ang 32 anyos nga biktima.
Ang biktima nibutyag kaniya nga diha siya sa gate naghatud sa iyang anak ug diha sab ang suspek naghatud sa anak.
“Nabantayan sa biktima niinit sa iyang likod nga bahin sa may lubot unya basa. Sa paglingi niya, gihipos sa suspek iyang ______” ug dunay niagas sa iyang likod, dugang sa gwardiya.
Si Monterroyo dali’ng niduol sa suspek nga dili mobiya kay dunay nireklamo, apan nitubag ang suspek og “humana.”
Matod sa guwardiya nga ilang gi-monitor ang suspek sanglit lima na ka biktima ang ningreklamo kabahin sa giingon nga pagbinastos ni Rusty.
Kunohay motan-aw sa iyang anak nga gihatod, apan mosandig sa haligi sa gate. Ang helmet itabon niya samtang magduwa-duwa sa kinatawo.
Nakuhaan siya og footage sa CCTV sa miaging Biyernes, Marso 22, sa samang buhat.
Dihang siya nasikop sa Lunes, gitamparos siya sa biktima nga 32 anyos nga dali nga nakapanghimasa.
Usa ka 42-anyos nga ginang nga nahinabi sa Superbalita Cebu niduaw sa Waterfront Police Station human nasayod sa pagkasikop ni Rusty.
“Sa gate gihapon, natingala ko nibasa akong likod. Sos, __________gyud sa laki unya nagdalig lakaw sakay sa motorsiklo,” asoy sa laing biktima.
Hinuon gipasaylo niya ang suspek kay naluoy siya sa gisulti sa kapuyo ug anak nga na-stroke kini.
Nanghinaot siya nga karon nga nadakpan ug pasakaag kaso sa laing biktima, magbag-o na ang suspek.
Ang anak nga babaye nga wala magpahingalan nakugang kay buotan iyang papa.