Duna nay gitutokan nga persons of interest ang Abellana Police Station sa pagpusil-patay sa usa ka disk jockey sa Nova X Bar sa General Maxilom Ave., Barangay Cogon Ramos, dakbayan sa Sugbo niadtong Sabado sa kaadlawon, Abril 20, 2024.
Matod ni Police Major Mark Don Alfred Leanza, hepe sa Abellana Police Station, nga nagpadayon sila karon sa ilang imbestigasyon ug manhunt sa mga mamumuno apan nagdumili lang una siya sa pagbutyag kon kinsa kini.
Ang biktima nga si Junrey Garces Jimeno, 27, uban niya ang iyang higala nga trabahante usab sa maong night club, niadto sa gi parkingan sa ilang motorsiklo sa usa ka fasfood chain apan niabot ang mga gunman nga nakamotorsiklo ug dayong pusil sa ulo sa biktima.
Namatay diha-diha si Jimeno samtang dali nga ningsibat ang mga killer luwan sa motorsiklo ug wala na matino kon asa nipaingon.
Ang kapulisan nagpadayon sa ilang pagpanguha og ebidensya sama sa CCTV footage.
Daghang anggulo ang gisubay karon sa mga imbestigador sa kapulisan apan usa na niini mao ang personal nga atraso nga may kalabutan sa iyang trabaho isip DJ sa night club.
Apan wala nila wad-a ang ubang motibo nga dili lang una niya ikabutyag.
“For the motive daghan tag nakita nga motive kay ang atoang victim daghan pud mga kontra,” matod ni Leanza.
Ang kabanay sa biktima duna nay gipanghatag nga mga impormasyon nga gisubay na usab sa kapulisan. / AYB