Duna nay person of interest ang Inayawan Police Station sa pagpusil-patay sa usa ka 45 anyos nga lalaki sa Sitio Sto. Niño, E. Sabellano Street, Barangay Población Pardo, Dakbayan sa Sugbo alas 2:15 sa hapon, Marso 18, 2025.
Ang biktima nga si Rudgie Dela Peña, taga Tungkop, Lungsod sa Minglanilla nakaangkon og samad pinusilan sa tiyan, dughan ug ubang bahin sa kalawasan hinungdan sa iyang hinanali nga kamatayon.
Moabot sa 12 ka mga basiyo ug tulo ka kabhang sa bala ang na-recover sa mga sakop sa Scene of the Crime Operation sa dapit nga nagpasabot nga gisiguro sa mamumuno nga mapatay ang biktima.
Si Police Lieutenant Colonel Maria Theresa Macatangay, deputy city director for operation sa Cebu City Police Office wala mohatag og detalye labot sa person of interest tungod kay nagpadayon pa ang imbestigasyon sa kapulisan sa Inayawan.
Apan basi sa ilang nakuha nga impormasyon, may kalabutan sa transaction sa ilegal nga drugas ang hinungdan sa pagpatay.
Dunay nakuha ang mga imbestigador sa kapulisan og pakete sa gituohang shabu sa lawas sa biktima.
Gimanduan ni Macatangay ang Inayawan Police Station nga mohimog backtracking sa mga CCTV camera sa dapit.
Bisan pa man sa maong insidente sa pagpamusil, gihulagway ni Macatangay nga usa lang kini ka isolated tungod kay nikunhod man ang krimen sa Dakbayan sa Sugbo kon itandi sa susamang period sa miaging tuig. / AYB