Wala’y giusik nga panahon ang Gilas Pilipinas ug nagpraktis dayon kini pipila lang ka mga oras gikan sa ilang paghiabot sa Jeddah, Saudi Arabia niadtong Huwebes sa buntag, Hulyo 31, 2025 (PH time).
Ning-abot ang Gilas sa siyudad nga gitawag og Bride of the Red Sea nga madasigon, malaumon ug adunay taas nga morale kabahin sa ilang kampanya sa Fiba Asia Cup nga ipahigayon karong Agusto 5-17.
Gipasabot ni national coach Tim Cone nga kinahanglan dayon nila mag-ensayo nga kauban ang Sugboanong higante sa San Miguel Beermen nga si June Mar Fajardo ug ang pambato sa TNT Tropang 5G nga si Calvin Oftana.
Wala nakaduwa sila si Fajardo ug Oftana sa sendoff game sa Gilas batok sa Macau Black Bears niadtong Lunes, Hulyo 28, sa Smart Araneta Coliseum gumikan kay pareho silang nakasinati og minor injury atol sa Philippine Basketball Associaton (PBA) Season 49 Philippine Cup finals series.
Tungod sab sa Philippine Cup finals series, nakapalta sab sila si Fajardo ug Oftana sa training camp sa Gilas sa Pampanga.
Si Fajardo, kinsa produkto sa University of Cebu (UC) Webmasters ug lumad nga taga Pinamungajan, Cebu, hingpit na nga naalim sa iyang angol (calf) samtang si Oftana (double sprained ankle), dili pa 100% nga naalim, hinuon makaduwa ra kini.
Aduna pa hinuon igong panahon nga makapraktis ang Gilas nga kompleto ang ilang puwersa gumikan kay karon pang Miyerkules sa alas 2:00 sa kadlawon, Agusto 6, ang labing una nilang tahas batok sa Chinese Taipei.
Gawas nila ni Fajardo ug Oftana, ang ubang mga sakop sa Gilas mao sila si naturalized Justin Brownlee, Scottie Thompson, Jamie Malonzo, Japeth Aguilar, CJ Perez, Chris Newsome, Dwight Ramos, Carl Tamayo, AJ Edu, ug Kevin Quiambao.
Ang Gilas ug Chinese Taipei nahisakop sa Group D kauban ang New Zealand ug Iraq.
Kontrahon sa Gilas ang New Zealand karong Agusto 7 sa alas 11:00 sa gabii dayon ang Irag karong Agusto 9 sa alas 4:00 sa hapon.
Ang kompetisyon adunay upat ka mga grupo nga gilangkuban og tag upat ka teams.
Ang mopatigbabaw sa matag grupo human sa single round robin makaderetso sa quarter-finals samtang ang No. 2 ug No. 3 teams mosagubang og knockout games batok sa teams gikan sa laing grupo aron pagkompleto sa quarter-finalists. / ESL