Misa de Gallo malinawon kay daghan ang polis

CEBU. Lieutenant Colonel Gerard Ace Pelare.
CEBU. Lieutenant Colonel Gerard Ace Pelare.Arnold Bustamante photo

Gihulagway sa kapulisan sa Central Visayas nga malinawon ang unang adlaw sa Misa de Gallo sa Sabado, Disyembre 16, 2023 kay way dagkong mga insidente nga natala.

Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, hepe sa Police Regional Office 7, nga ang rason sa kamalinawon sa Misa de Gallo tungod sa presensya sa daghan nga mga polis.

Nabantayan ni Pelare nga daghan ningsimba sa dagkong mga simbahan sama sa Basilica Minore del Santo Niño, Cebu Metropolitan Cathedral ug sikbit nga mga parokya, apan bisan pa man niini way na-report nga dagko’ng mga krimen.

Dunay mga kaso sa disgrasya sa kadalanan apan wala sila nakadawat og report gikan sa lainlaing probinsya sa Central Visayas nga dunay dagkong krimen.

“Matawag gyud nato nga generally peaceful ang Misa de Gallo kay wala man ta maka record og major incidents, “ matod ni Pelare.

Sa wala pa nagsugod ang Misa de Gallo, nihimo og inspection sila si Aberin ug Police Colonel Erenio Dalogdog, hepe sa Cebu City Police Office, sa mga simbahan kon natuman ba ang security plan ug duna bay mga police assistance desk sa matag simbahan.

Sa miaging semana, ang matag city ug provincial police office directors nihatag sa ilang mga security plan alang sa mga kalihukan sa holiday season.

Nakita hinuon nila nga nasunod ra ang security plan sa matag simbahan apan dunay angay nga i-adjust, depende sa usa ka lugar.

Subling niawhag ang PRO7 sa publiko nga dili magdala og mahalong mga butang ug dakong kantidad sa kwarta kon mosimba sa Misa de Gallo aron dili sila mahimong target sa mga kawatan.

Dunay mga operation nga gihimo sa matag police office batok sa ilegal nga drugas ug ubang matang sa krimen tungod kay wala sila mohunong sa anti-criminality campaign ning panahon sa holiday season.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph