Nakapasulod og mid-range jumper si Devin Booker sa nahabiling 1.7 segundos aron agakon ang hosts Phoenix Suns sa kulbahinam nga daog batok sa Milwaukee Bucks, 108-106, ning Martes, Marso 25, 2025 (PH time), sa National Basketball Association (NBA).
Sa katapusang posisyon sa bola, nasipyat si Bucks center Brook Lopez sa iyang turnaround jumper nga mao unta ang makapugos og overtime.
Ang daog, nga maoy ikaupat nga sunodsunod nga namugna sa Suns, grabe ka krusyal alang kanila gumikan kay nagtukmod kini kanila sa posisyon alang sa play-in tournament ning puntoha nga nagkaduol na ang pagtiklop sa regular season.
Ang Suns ningsaka sa 35-37 nga rekord, ika-10 sa Western Conference.
Sa wala pa ang mabayanihong puntos ni Booker, si Kevin Durant mao una ang nikayod og maayo aron agakon ang Suns ning grabe ka sikit nga engkuwentro.
Gipangulohan ni Durant ang Suns pinaagi sa iyang 38 puntos, nidugang og 19 puntos si Booker, niamot og 12 puntos si Ryan Dunn samtang nitampo og 10 puntos si Nick Richards.
Ang Bucks gipangulohan ni Giannis Antetokounmpo pinaagi sa iyang 31 puntos, nitunol og 23 puntos si Lopez, nihatag og 19 puntos si Gary Trent Jr. samtang nitampo og 15 puntos si Kyle Kuzma.
Taliwala sa ilang pagkapilde, ang Bucks nagpabilin sa ikalimang puwesto sa Eastern Conference dala ang 40-31 nga rekord.
Nakakompleto si Kuzma og talagsaong four-point play sa nahabiling 1:22 minutos nga naghatag sa Bucks og 105-103 nga labaw.
Gitubag kini ni Durant og three-point bomb nga naghatag sa Suns og 106-105 nga labaw sa nahabiling 26 ka mga segundos.
Sa return play, nahatod si Lopez sa freethrow line apan usa ra ang iyang napasulod sa duha ka freethrows nga maoy nagtabla sa duwa, 106-106.
Human niini, nadawat ni Booker ang bola gikan sa inbound pass unya ni-dribble siya’g kadiyot una niitsa sa iyang nakapadaog nga jumper. (AP)