Naukay ang mga residente sa Purok Kamanggahan, Barangay Lutac, Dakbayan sa Naga human gipangtigbas ug gipangluglog ang liog sa inahan ug duha niya ka anak alas 10:30 sa buntag, Lunes, Enero 27, 2025.
Ang responsable mao ra usab ang padre de pamilya nga giingong nalisuan sa maayong pangisip tungod sa paggamit sa ilegal nga drugas nga giila nga si Carlo Camporedondo, 33, lumad nga taga Cabadbaran, Agusan del Norte.
Ang biktima giila nga silang Junelyn Jimenez, 32, ug ang iyang duha ka anak nga silang John Carlo Camporedondo 11 ug LJ, 2 anyos nga babaye.
Matod ni Jessa Rico ang manghod ni Junelyn nga human mapatay sa suspek ang mga biktima dali ni nga nigawas sa balay nga bitbit pa ang hait nga sundang ug gisunod unta sa pagtigbas ang iyang inahan maayo na lang kay nakatago sa balay sa ilang silingan.
“Paggawas niya human niya gipanigbas ang akung mga pag-umangkon ug akung igsuon, si mama pud unta to iya sad patyon. Nakadagan man si mama nakatago sa among silingan, paglugsong niya sa ubos niana siya nga patay na,” matod ni Jessa.
Human sa hitabo dali nga nisibat ang suspek dala-dala pa niini ang hait nga sundang paingon sa bungtod nga gituohan nga nagtagutago sa kakahuyan.
Dugang ni Jessa nga ang 11 anyos wala moeskwela tungod kay nagsakit ang ngipon samtang ang 7 anyos nga grade 2 mao ra ang niadto sa eskwelahan.
Naninda untag butong ang suspek og ang iyang maguwang apan pag-abot nila sa sentro nga maoy kuhaanan nila og butong, wala silay kabutangan niini sanglit puno matod pa ang ilang kariton og mga binuak na nga mga butong nga tungod ani namauli lang usa ang duha ug wala na modayon og pamaligya.
Apan natingala na lang sila nga nikalit lang og suol ang sakit ni Carlo nga niresulta sa paghimo niini sa krimen.
Sa miaging tuig nadala na sa Psychiatric Ward sa Vicente Sotto Memorial Medical Center ang suspek tungod kay nisaka ang kabuhi niini.
Sukad niadto, duna na siyay gitumar nga maintenance sa iyang sakit tungod kay mokalit lang og kalain ang paminsar.
Nagumon sa ilegal nga drugas si Carlo nga mao matod pa ang nakaingon sa iyang pagkalibug sa pangisip.
“Bisan naa na siyay maintenance sa buang, mo-take gihapon na siya og shabu sir ba, mao na sir,” dugang ni Jessa.
Kon mosuol matod pa ang sakit niini kanunay na niya awayon ang iyang asawa ug mangabubho usab ni bisan kinsa na lang nga tawo.
Matod sa mga silingan sa mga biktima nga kanunay na nga mag-away ang mag live-in partner sa wala pa matino nga hinungdan. Gani usa sa mga silingan niini niadto lang miaging semana nibutyag nga nagtama sa ilegal nga drugas ang suspekug hapit usab siya matigbasi niini.
Patay na ang mga biktima dihang niabot ang kapulisan sa lugar nga nahitaboan sa krimen.
Ang Naga City Police Station nilusad dayon og manhunt sa dapit uban sa mga barangay official sa Brgy. Lutac ug ilang nadakpan sa silingang sitio sa Lutac. / AYB / GPL /DVG