AGI og pagpangandam alang sa umaabot kasaulogan sa kapistahan sa Lungsod sa Badian karong buwan sa Hulyo, gipailaila na ang opisyal nga mga kandidata ug kandidato alang sa Miss Badian 2025 ug Hari ng Badian 2025.
Niadtong Sabado, Hunyo 14, 2025, gihimo ang official sashing alang sa candidates sa Miss Badian ug Hari ng Badian nga lakip sa mga angay atngan sa mga residente sa lungsod atol sa ilang kapistahan.
Mismo si Badian Mayor-elect Jerome Librando mao ang nangunay pag-sash sa mga kandidata sa Miss Badian 2025 nga naglakip nila ni: Abby Perez CaƱete, Angel Grace Fuentes Mangaron, Sheree Mare Danday, Jojo McLean, Mariah Marah Pasaol, Rachelle Anne Tingal, Erica Jean Cadayday, Althea Mae Uy, Caitlin Martinez, Alyssa Bella Suarez, Maria Fey Navasquez, Desiree Jabonero, Charry Layese, Lea Coronado, Johanna Francisco, ug Qatari Semblante.
Samtang si Earl Vincent Enbad, ang tourism officer sa lungsod mao ang nitaod sa sash sa mga kandidato sa Hari ng Badian 2025.
Naglakip kini nila ni: Matthew Bardilas, Aldritch Amabao, Herol James Liston, Stephan Lee Jaime Enriquez Salomon, Lance Daniel Cruz, Mamerto Lemente, Daniel Tangalin, Ren Fortich, Gabriel Exequiel Cabalhin, Miguel Brigoli, JM Jagdon, Jericho Vinz Pedrano, Chun Yu Lim, ug Wilhelm Josh Go.
Alang sa duha ka pageants karong tuiga, gibuksan nila kini sa nagkalainlaing dapit sa Sugbo aron motabang kanila sa pag-promote sa turismo ug kultura sa lungsod.
Matod ni Mayor-elect Librando nga dili lang mohunong sa pageant's night ang suporta sa lokal nga kagamhanan sa mga mananaog apan mamahimo sab kini nila nga suportaran sa national stage.
Makadawat og P100,000 ang Miss Badian 2025, samtang P50,000 ang dawaton sa Miss Badian Ecotourism 2025, ug P50,000 ang gapaabot sa Miss Badian Heritage 2025.
P20,000 usab ang dawaton sa mananaog nga Hari ng Badian 2025.
Sa Hulyo 20 na ang grand coronation night sa Miss Badian 2025 samtang sa Hulyo 22 ang Hari ng Badian. / HBL