Patay nang nakit-an sa sapa nga naglutaw ang usa ka dalaga nga person with disability (PWD), alas 2:30 sa hapon sa Martes, Abril 16, 2024, sa Sityo Pandongbato, Barangay Media Once, siyudad sa Toledo.
Ang biktima giila nga si Joy Anna Marie Madrid Algarme, 22, taga Sityo Bawud, Brgy. Media Once, diin unang gikataho nga missing.
Sa pasiunang imbestigasyon sa kapulisan sa Toledo ubos sa kamandoan sa ilang hepe nga si P/Lt. Col. Manolo F Salvatierra nasayran nga ang dalaga missing sa hapon sa Huwebes, Abril 11, 2024.
Gipangita siya sa pamilya ug gipa-blotter sa kapulisan human wa makit-i.
Apan niadtong Martes, siya nakit-an sa tulo ka mga batan-ong lalaki nga nangita og salag sa langgam sa sapa.
Ang tulo daling ningpahibalo sa mga opisyal sa barangay nga maoy nagpahibalo usab ngadto sa kapulisan.
Ang Toledo Police ni-request sa PNP Scene of the Crime Operation (Soco) pagproseso sa maong dapit ug sa lawas sa dalaga.
Atol ning pagsuwat, nagpadayon ang imbestigasyon sa kamatayon sa dalaga. / DVG