Giimbestigahan sa National Police Commission (Napolcom) ang pipila ka mga dagkong opisyal sa Philippine National Police tungod sa posibleng kalambigitan sa kaso sa mga nawala nga mga sabungero.
Sa usa ka press conference niadtong Huwebes, Agusto 7, 2025, matod ni Napolcom Vice Chairperson ug Executive Officer Rafael Vicente Calinisan nga subay sa mando ni Presidente Ferdinand “Bongbong” Marcos Jr., ila pang gipalawman ang imbestigasyon sa pagkawala sa mga sabungero labina ang posibleng kalambigitan sa kapulisan.
Dugang niya, wala lang sila nagsalig sa pahayag sa akusado nga nahimong whistleblower nga si Julie “Dondon” Patidongan.
“Sabihin na lang natin 18 ‘yung kinasuhan ni Totoy (Patidongan), 12 ‘yung kinasuhan sa ating legal service pero tuloy-tuloy ang imbestigasyon ng Napolcom. Meron tayong natatalisod pa na ilan pang mga pangalan na hindi pa lumalabas sa kaalaman ng publiko and we are pursuing these names until now,” matod ni Calinisan.
“No stones unturned. Ang instruction ng Presidente simple: mag-imbestiga ng maayos, walang sacred cows.
‘Yun ang ginagawa natin at wala tayong kinakatakutan kahit ano pang ranggo ‘yan. Kasama siguro doon, para aware na rin kayo, may mga heneral tayong iniimbestigahan,” dugang niya.
Sa usa ka resolusyon nga gipetsahan og Agusto 4, 2025, gimanduan sa Napolcom ang 90-adlaw nga suspensyon sa mga mosunod nga personahe sa pulisya nga giapil ni Patidongan sa kaso sa mga nawala nga sabungero: Police Colonel Jacinto Malinao Jr., Police Lieutenant Colonel Ryan Jay Orapa, Police Major Mark Philip Almedilla, Police Executive Master Sergeant Aaron Ezrah Cabillan, Police Chief Master Sergeant Arturo dela Cruz Jr., Police Staff Master Sergeant (PSMS) Joey Encarnacion, PSMS Mark Anthony Manrique, PSMS Anderson Abary, Police Master Sergeant (PMSG) Renan Fulgencio, Police Staff Sergeant (PSSG) Alfredo Andres, PSSG Edmon Muñoz, ug Police Corporal Angel Joseph Martin.
Si Malinao, kanhi direktor sa Batangas Provincial Police Office, giimbestigahan tungod sa giingong grave misconduct, grave neglect of duty, ug conduct unbecoming of a police officer.
Ang laing 11 ka mga pulis nag-atubang sa mga reklamo nga grave misconduct ug conduct unbecoming of a police officer.
Giangkon ni Patidongan nga kini nga mga personahe sa pulisya nakadawat og binulan nga “payola” nga nagkantidad og P2 milyunes hangtod P200,000 gikan sa negosyante ug gaming tycoon nga si Charlie “Atong” Ang kinsa iyang giakusahan nga utok sa pagdagit ug pagpatay sa mga nawala nga mga sabungero. / TPM / SunStar Philippines