Misukol sa kapulisan: 2 patay, 1 nakaikyas

Bohol map
Bohol map

Duha ka mga gidudahang tulisan ang nakalas samtang usa ang nakaikyas atol sa gilusad nga manhunt sa mga sakop sa Provincial Intelligence Unit (PIU) sa Bohol Police Provincial Office (BPPO) ug Sikatuna Munici­pal Police Station sa Sabado sa udto, Hunyo 1, 2024.

Ang mga nakalas giila nga silang Jonas Amen, residente sa Ubujan District, dakbayan sa Tagbilaran ug Ricky Gamo, taga Barangay Tagbuane, lung­sod sa Alburquerque, Bohol.

Sa imbestigasyon sa BPPO, nasuta nga pasado alas 9 sa buntag sa Sabado, gikataho nga dunay pagsuway sa pagpanulis sa lungsod sa Sikatuna sa tulo ka wala mailhing armadong lalaki nga sakay og motorsiklo.

Dali nga nitaho ang biktima sa kapulisan sa Sikatuna nga dali usab nga gipahibawo ang mga kasikbit nga lungsod ug ang provincial command sa BPPO.

Gihatag sa ubang police stations ang mga nakuhang hulagway sa tulo ka mga suspek nga nagsakay og motorsiklo alang sa ilusad nga manhunt.

Alas 11:30 sa buntag sa samang adlaw, ang mga personnel sa PIU sa BPPO, nakig-ala­yon sa kapulisan Sikatuna aron paglusad og intelligence build up ug hot pursuit ilabi na sa mga silingang lungsod sama sa Corella, Cortes ug Balilihan nga posibling mao ang giagian sa mga suspek.

Samtang ang mga personnel sa PIU nagsubay sa provincial road sa Purok 1, Barangay Anislag, lungsod sa Corella, ilang nasigpatan ang tulo ka lalaki nga nagsakay sa usa ka pula nga motorsiko nga nihaom sa hulagway nga gipakatap sa tanang units sa kapulisan sa Bohol.

Sa diha gisinyasan ang drayber sa motorsiklo nga mohunong sa daplin sa karsada, nipakusog hinuon kini sa pagpadagan nga maoy hinungdan nga gigukod ni sa mga polis.

Pag-abot sa gilay-on nga 300 metros nga ginukdanay, gibiyaan sa tulo ka suspek ang motorsiklo nga ilang gigamit ug misuot kini sa kasagbutan nga lugar dungan sa pagpamusil niini sa mga polis nga migukod kanila nga maoy hinungdan nga usa sa mga personnel sa PIU ang naigo apan wala ra maunda kay naka-bullet proof ni.

Dinhi na nahitabo ang binaw­sanay og pusil sa habig sa mga polis ug sa tulo ka mga suspek nga ningresulta sa pagkaigo sa duha samtang ang usa nga kauban niini maoy nakasibat.

Ang duha ka mga samaran nga suspetsado daling gidala sa Governor Celestino Gallares Memorial Hospital sa dakbayan sa Tagbilaran apan gideklarar nga dead on arrival (DOA) ni Dr. Charmain Gail Torrefranca.

Base sa intelligence investigation, ang duha ka mga sus­pek nga nakalas mao ang gi­tumbok nga responsabli sa pagpanulis niadtong Mayo 30, 2024 sa usa ka gasoline station sa lungsod sa Dauis.

Sa Mayo 23 ning tuiga, sila usab ang suspect sa tulis sa usa ka convenience store sa Tagbilaran ug sa May 22, 2024, laing gas station ilang gitulis sa lungsod sa Maribojoc. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph