‘Misukol’ sa kapulisan, tipi

PATAY: Ang suspek sa kasong murder nga si Godofredo Manzanades alyas Junie patay atol sa engkwentro tali sa kapulisan sa lungsod sa Dumanjug, alas 2:30 sa hapon, Dominggo, Nobiyembre 5, 2023.
PATAY: Ang suspek sa kasong murder nga si Godofredo Manzanades alyas Junie patay atol sa engkwentro tali sa kapulisan sa lungsod sa Dumanjug, alas 2:30 sa hapon, Dominggo, Nobiyembre 5, 2023. Tampo nga hulagway

Suspek sa mga kasong murder sa dakbayan sa Sugbo ug lungsod sa Dumanjug napusilan-patay sa kapulisan sa bukirang barangay sa Kolabtingon, Dumanjug, alas 2:30 sa hapon, Dominggo, Nobiyembre 5, 2023.

Sa pasiunang nakuhang kasayoran sa Superbalita Cebu gikan sa kasaligang tinubdan, ang napatay giila nga si Godofredo Manzanades alyas Junie, hamtog na ang pangidaron, ulitawo apan dunay kapuyo ug taga Barangay Apo nga bukirang bahin sa lungsod sa Argao.

Dugang nasayran nga ang kapulisan sa Dumanjug nakadawat og tawag bahin sa usa ka armadong tawo sa Barangay sa Kolabtingon.

Kini ang hinungdan nga nires­ponde ang kapulisan sa Dumanjug ubos sa kamandoan sa ilang hepe nga si Police Captain Jan Ace Elcid Layug ug positibo ang maong taho.

Apan matod pa nga si Manzanades maoy nanguna og pamusil sa mga polis gamit sa iyang .45 pistol hinungdan nga nahitabo ang engkwentro nga niresulta sa iyang kamatayon.

Ug nasayran sa kapulisan nga si Manzanades maoy suspek nga nipusil-patay sa biktima nga si Climark Blanco, 24, ulitawo nga taga Barangay Apo apan ang biktima didto gipatay sa Barangay Pawa, Dumanjug niadtong Oktubre 13, 2023, alas 2:00 sa hapon.

Matod pa nga ang biktima naglakaw lang padulong mobisita sa iyang amigo sa Pawa, Dumanjug apan gihunongan sa motorsiklo ni Manzanades ug gipusil kini nga niresulta sa kamatayon sa biktima.

Si Manzanades niiskapo, wa madakpi sa mga pulis sa Dumanjug niadtong higayona.

Samtang, alas 6:00 sa gabii sa Oktubre 31, 2023 sa Unit 3 Oppra Plaza, Barangay Kalunasan, siyudad sa Sugbo, si Manzanades maoy suspek usab sa pagpusil-patay sa biktima nga si Paul Jacob Ebrada, 34, ug taga Oppra Plaza sa Kalunasan.

Ang biktima kuyog sa iyang mga barkada nag-inom ug nibuwag sa grupo human niadto sa tindahan kay may paliton, apan sa kalit lang nitumaw ang suspek ug gipusil ang biktima nga nakabsan sa kinabuhi.

Ang suspek daling nisibat ug wa madakpi sa mga polis sa Guadalupe Police Station sa Cebu City Police Office (CCPO) nga niresponde.

Si Manzanades gitumbok sa kapulisan nga usa ka gun for hire ug nalambigit sa illegal nga drugas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph