Nasamdan ang usa ka drug personality human nakigpinusilay sa kapulisan nga sakop sa Station Drug Enforcement Unit sa Mabolo Police Station nga nagpahigayon og buy-bust alas 11:00 sa gabii, Martes, Agusto 5, 2025, sa Sitio Rio 1, Barangay Apas, Siyudad sa Sugbo.
Atol sa maong operation, nadakpan sab ang laing tulo ka kauban niini nga naabtan sa kapulisan sa dapit nga namaligya og ilegal nga drugas.
Ang napusilan sa mga polis nga naa sa Cebu City Medical Center mao si Harry Mistula Candaza, 40, nga nagpuyo ra sab sa maong lugar.
Samtang gibalhog sa temporary custodial facility sa Mabolo sila si Retchel Ladera Solon, 40, manghod niini nga si Paulo James, 28, ug Vincent Retura Buar, 30, pulos nagpuyo sa Sitio Rio 1, Barangay Apas, Dakbayan sa Sugbo.
Nakuha sa mga polis ang 27 ka putos sa gituohang shabu ug ang usa ka kalibre .45 nga pistola nga dunay upat ka bala.
Gipaubos sa monitoring ug surveillance ang suspek ug dihang nasuta nga tinuod ang kasayuran, gilusad ang buy-bust.
Dihang gi-transact na ang mga suspek, nakabantay si alyas Harry nga polis ang iyang gikasabot ug kalit nihulbot sa iyang armas og giunhan sa pagpusil ang mga polis.
Way naigo sa habig sa mga polis ug gibawsan ang suspek sa pagpusil.
Samtang dunay drug den sa Dakbayan sa Tagbilaran ang gironda sa mga operatiba sa Philippine Drug Enforcement Agency (PDEA)-Bohol Provincial Office alas 6:07 sa gabii, Martes, Agusto 5, 2025, nga nahimutang sa
Purok 8, Barangay Cogon nga niresulta sa pagkasikop sa tulo ka mga tawo apil ang ilang target.
Ang Regional Director sa PDEA 7 nga si Joel Plaza niila sa nadakpan nga maoy target sa operation nga mao sab ang nagpadagan sa drug den nga si alyas Ray, 31, nga residente ra sab sa maong dapit.
Lakip sa nadakpan ang duha ka construction worker nga naatlan nga naghingos og shabu sa sulod sa drug den nga silang alyas Romulo, 39, taga Carmen Bohol ug alyas Jonathan, 33, taga Danao, Probinsiya sa Bohol.
Nakuha sa mga sakop sa PDEA Bohol ang 12 ka pakete sa gituohang shabu nga motimbang sa 290 gramos nga dunay average market value nga P136,000. / AYB